काठमाडौं । रुसी सेनामा भर्ना भएका नेपालीका परिवारले आफ्ना आफन्तलाई स्वदेश फिर्ताका लागि पहल गरिदिन गृह मन्त्रालयसमक्ष आग्रह गरेका छन् । शुक्रबार उपप्रधान एवं गृहमन्त्री रवि लामिछानेसमक्ष केही पीडित परिवारले ११ बुँदे माग राखेका हुन् ।

उनीहरूले सकुशल उद्धार, मृतक आश्रित परिवारलाई उचित राहत, मृतक भनिएका तर पुष्टि नभएकोको अवस्था सार्वजनिक, बेपत्ताको खोजी, युक्रेनले युद्धबन्दी बनाएकाहरूको उद्धार र घाइतेको उचित उपचारलगायत विषयमा सरकारलाई गम्भीर हुन आग्रह गरेका हुन् । 

जवाफमा गृहमन्त्री लामिछानेले समस्याबारे आफू पूर्ण जानकार रहेको र अन्तरदेशीय समन्वय प्रभावकारी नहुँदा समस्या भएको बताए ।

"तपाईंहरूको पीडाबारे पूर्ण जानकार छु । नेपालभित्रै पनि समन्वय अभावका कारण थप पीडा खेप्नुपरेको छ । यसबारे कसरी समन्वय गर्न सकिन्छ, आज/भोलि नै प्रधानमन्त्रीसँग छलफल गर्छु," लामिछानेले भने ।

रुसी सेनामा रहेका आफूहरूका आफन्तलाई सकुशल फर्काइदिने आश्वासन दिएर केहीले आफूहरूबाट पैसा लिएको भन्दै पीडित परिवारले तिनलाई पक्राउ गर्न पनि आग्रह गरेका छन् ।