काठमाडौं । प्रतिनिधिसभा अन्तर्गतको महिला तथा सामाजिक मामिला समितिले बालसुधार गृहहरूमा स्वास्थ्यकर्मी रहने व्यवस्था गर्न सरकारलाई निर्देशन दिएको छ । 

सिंहदरबारमा शुक्रबार बसेको समिति बैठकले बालसुधार गृहको अनुगमन गर्दा स्वास्थ्यकर्मी नरहेको पाइएको भन्दै तत्काल स्वास्थ्यकर्मीको व्यवस्था गर्न सरकारलाई निर्देशन दिएको हो । समितिले बालसुधार गृहमा रहेकालाई खुवाउने खानाको गुणस्तर निकै कमजोर रहेको र सफा खानेपानीको पनि अभाव देखिएकाले यसमा विशेष ध्यान दिन समेत सुझाव दिएको समिति सभापति किरणकुमार साहले जानकारी दिए ।

केही सुधार गृहहरू सेवामुलकभन्दा पनि नाफामूलक देखिएकाले संस्थाले नाफामूलक तवरले चलाएका गृहको अनुगमन गरी सुधार गर्न समेत निर्देशन दिएको उनले बताए । 

बैठकमा समिति सदस्यहरूले बालसुधार गृहमा रहेका बालबालिकाको अधिकारमाथि खेलवाड भइरहेको बताएका थिए । समिति सदस्य विन्दबासिनी कंशाकारले बालसुधार गृहको निरन्तर अनुगमन गरेर उनीहरूको समस्या समाधान गर्नुपर्ने बताइन् ।  त्यस्तै, समिति सदस्य रोशन कार्कीले बालसुधार गृहहरुमा रहेकाले पढ्न चाहे त्यसको व्यवस्था गर्नुपर्ने बताए ।