काठमाडौं । ‘एसएमएस फ्रेन्डसिप कप’को आफ्नो तेस्रो खेलमा गुजरात क्रिकेट एसोसियसनविरुद्ध आठ रनको जित निकाल्दै नेपाल लिग चरणको अन्तिम खेलअगावै प्रतियोगिताको फाइनलमा प्रवेश गरेको छ । 

बुधबार भारतको वापीमा भएको खेलमा नेपालले प्रस्तुत गरेको १८२ रनको लक्ष्य पछ्याएको गुजरातले निर्धारित २० ओभरमा सात विकेट गुमाएर १७३ रनमात्र बनाउन सक्यो ।

गुजरातका उमंग टन्डेलले ४७ रन बनाए पनि टिमको हार टार्न सकेनन् । हर्ष देसाईले २९, अभिनाश देसाईले २० र स्मित पटेलले १९ रन जोडे ।

नेपालका कुशल मल्ल र सोमपाल कामीले समान दुई विकेट लिए । एक ओभर बलिङ गरेका कुशलले तीन रनमात्र खर्चिए । यसबाहेक, विवेक यादवले एक विकेट हात पारे ।

त्यसअघि टस हारेर ब्याटिङमा आएको नेपालले निर्धारित २० ओभरमा सात विकेट गुमाएर १८१ रनको योगफल खडा गरेको थियो । 

नेपालका ओपनर आसिफ सेखले सर्वाधिक ८५ रन बनाए । यस्तै, अर्का ओपनर कुशल भुर्तेलले ६७ रन थपे । 

गुजरातका आर्या देसाई र ध्रुशान्त सोनीले समान दुई विकेट लिए । 

शृंखलामा यसअघि नेपालले पहिलो खेलमा पनि गुजरातलाई आठ विकेटले हराएको थियो । यस्तै, दोस्रो खेलमा नेपाल बरोडाविरुद्ध २७ रनले विजयी भएको थियो ।