काठमाडौं । नेकपा (एमाले)का सांसद रघुजी पन्तले भारतको चाहनामा बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिम्स्टेक) गठन गरिएको बताएका छन् ।

“यो (बिम्स्टेक) बनाउन भारतको निर्णायक इन्ट्रेस्ट देखिन्छ, त्यो के भने यो संगठनबाट पाकिस्तानलाई बाहिर राख्ने,” मंगलबार प्रतिनिधिसभा बैठकमा बिम्स्टेक बडापत्रको प्रावधानमाथिको छलफलका क्रममा उनले भने, “पाकिस्तानलाई बाहिर राखेर आफ्नो भूमिकालाई अगाडि ल्याउने । पाकिस्तान भएकै कारण सार्कलाई निष्क्रिय बनाइएको छ ।”

दक्षिण एसियाली क्षेत्रीय सहयोग संगठन (सार्क)को अध्यक्ष अहिले नेपाल रहेकाले त्यसलाई जगाउने कार्य गर्नुपर्नेमा उनले जोड दिए । “सार्कभित्र हाम्रो भूमिका जति बढी हुनसक्छ, बिम्स्टेकमा कम हुनसक्छ,” सार्कलाई जगाउनुपर्ने कारणबारे उनले भने ।

बिम्स्टेकमा पनि निर्णायक हैसियत भारत रहेको उनको भनाइ छ । बिम्स्टेकमा सामेलपछि के–के फाइदा लियौँ भनेर नेपालले समीक्षा गर्नुपर्ने उनले बताए । “सम्मेलनमा भाग लिनबाहेक के–के पायौँ भन्ने ठोस कुरा केही देखिँदैन,” सांसद पन्तले भने ।