काठमाडौं । नेपाल कम्युनिस्ट पार्टीका महासचिव नेत्रविक्रम चन्दले नेपालमा राजनीतिक दलहरूको अनुशासन लागु गर्ने समय नभएको बताएका छन् । 

सोमबार पार्टीले काठमाडौंमा आयोजना गरेको सहिद गाथा ‘राष्ट्रको लागि बलिदान’ लोकार्पण तथा सहिद परिवार सम्मान कार्यक्रमलाई सम्बोधन गर्दै महासचिव चन्दले देशमा पार्टीको अनुशासन लागु गर्ने समय नभएको बताएका हुन् । उनले कुनै पार्टीको अनुशासनले अब कसैलाई नछेक्ने बताए । 

पुरानो तरिकाको पार्टीको आदेशले राजनीति नचल्ने पनि उनले स्पष्ट पारे । जनताले नयाँ चिज खोजिरहेको भन्दै त्यो दिन आँट गर्नुपर्ने बताए । महासचिव चन्दले एक्लैएक्लै बसेर शक्तिको दाबी गरेर हिँड्ने समय पनि नभएको जिकिर गरे । 

उनले भने, "कुनै पार्टीको अनुशासनले कसैलाई छेक्नेवाला छैन अब । सबैले बुझ्नुपर्छ । पार्टीको अनुशासन लागु गर्ने समय अब नेपालमा छैन । पार्टीको आदेशमा पुरानै तरिकाले राजनीति चल्नेवाला छैन । हामीले आँट गर्नुपर्छ, एक्लै एक्लै बसेर शक्तिको दाबी गरेर हिँड्ने मात्रै होइन कि अगाडि बढ्न चाहने सबै जनताको बीचमा माक्र्सले कम्युनिस्ट घोषणापत्रमा लेख्नुभए जस्तै खुल्लमखुल्ला घोषणा गर्न सक्नुपर्छ । दाबी गर्न सक्नुपर्छ । नेपालको अग्रगमन के हो ? रुपान्तरणको आन्दोलन के हो ?"

महासचिव चन्दले कम्युनिस्ट पार्टीको झण्डालाई आफूहरूले माथि उठाउने बताए ।