काठमाडौं । शिक्षमन्त्री सुमना श्रेष्ठले त्रिभुवन विश्वविद्यालयबाट विद्यार्थीहरूको उत्तरपुस्तिका हराएको विषयमा प्रतिक्रिया जनाएकी छन् । बिहीबार साँझ सामाजिक सञ्जालबाट मन्त्री श्रेष्ठले परीक्षार्थीमा पर्ने मानसिक तनाव तथा विश्वविद्यालयमाथि उठ्ने प्रश्न र शंकाप्रति संवेदनशील हुनैपर्ने बताएकी छन् ।
मन्त्री श्रेष्ठले नियमितजस्तो भइरहेका यस्ता घटनाहरूबारे आफूहरू जानकार रहेको पनि बताएकी छन् ।
"उत्तरपुस्तिका हराएका परीक्षार्थीहरूको पुन: परीक्षाबाट मात्र यस्ता समस्या समाधान हुने होइनन् । यस्ता घटनाहरू दोहोरिन नदिन घटना घट्नुको कारण पत्ता लगाएर सम्बन्धितहरूलाई उचित कारबाही र प्रक्रिया सुधार अनिवार्य हुन्छ," उनले भनेकी छन् ।
बिहीबारमात्र उत्तरपुस्तिका हराएको विषयमा छानबिन गर्न त्रिविले उच्चस्तरीय छानबिन समिति बनाएको छ ।
समितिले निष्पक्ष, निर्भीक र परिणाममुखी कार्य गर्ने वातावरण बनाउन शिक्षा मन्त्रालयले हदैसम्मको सहयोग गर्ने मन्त्री श्रेष्ठको भनाइ छ ।
