काठमाडौं । नेकपा (एमाले) का सांसद कृष्णगोपाल श्रेष्ठले गृहमन्त्री रवि लामिछानेको सुरक्षाको लागि दुर्गा प्रसाईंको जस्तो हतियार छ कि छैन भनेर प्रश्न गरेका छन् ।

बुधबार राज्य व्यवस्था तथा सुशासन समितिको बैठकमा सांसद श्रेष्ठले राज्यका उच्च पदस्थ व्यक्तिहरूको सुरक्षाको सम्बन्धमा प्रश्न गरेका हुन् । उनले प्रसाईंजस्तो नागरिकले उच्च तहको हतियार बोकेर हिँड्ने गरेको भन्दै उनलाई त्यो तहको सुरक्षा आवश्यक थियो कि थिएन भनेर प्रश्न गरे ।

उनले राष्ट्रपति, प्रधानमन्त्री र गृहमन्त्री त्यो तहको हतियार बोकेर हिँड्छन् हिँड्दैन भनेर पनि प्रश्न गरे । हतियार बोक्न अनुमति दिने अधिकारीको सम्बन्धमा पनि उनले प्रश्न गरेका थिए ।

"एउटा नागरिकको सुरक्षाका लागि त्यो तहको हतियार बोक्नुपर्थ्यो कि पर्दैनथ्यो ? त्यति संख्याको गोलिगट्ठा बोक्नुपर्थ्यो कि पर्दैनथ्यो ? यो मुलुकको राष्ट्रपतिको सुरक्षामा हिँड्ने सुरक्षाका अगुवा र पछुवाले कुन तहको हतियार बोक्छन् ? प्रधानमन्त्री, गृहमन्त्री हिँड्दा अगाडि, पछाडि त्यो तहको हातहतियार र गोलिगट्ठासहित हिँड्ने गर्नुभएको छ कि छैन ? जवाफ दिनुपर्‍यो नि," उनले भने ।

उनले अगाडि थपे, "लाइसेन्सप्राप्त हतियार ? लाज पनि छैन । कसले दिएको त्यो लाइसेन्स ? त्यस्तो हतियार बोक्ने लाइसेन्स कसले दियो ? लाइसेन्स चेक गर्नुप‍र्‍यो । दिने मान्छे को हो ? कहाँबाट दियो ? र, त्यही हतियारको लाइसेन्स दिएको हो कि होइन ?"