पोखरा । गत शनिबारदेखि सुरु भएको एमाले कास्कीको ११औँ जिल्ला अधिवेशनअन्तर्गत मंगलबार साँझमात्र मतदान भएको छ । विद्युतीय मेसिनबाट भएको मतदानमा एउटा प्रतिनिधिले १२२ जनालाई मत दिएका थिए ।
निर्वाचन समितिले मंगलबार दिउँसो १ः३० बजे नै मतदान गर्ने कार्यतालिका जारी गरेको थियो । तर, मेसिनमा प्राविधिक समस्या देखिएपछि ६ घण्टापछि मात्र मतदान सुरु भएको थियो ।
अबेर भइसकेका कारण र सुरक्षाका कारण जिल्ला प्रशासन र एमाले पदाधिकारी बैठकमा मतदान कार्य बुधबार सार्ने विषयमा छलफल पनि भएको थियो । तर, लामबद्ध अधिवेशनका प्रतिनिधिहरूले मंगलबार अबेर नै भए पनि मतदान गर्नैपर्ने दबाब दिएका थिए । त्यसपछि बाक्लो सुरक्षाका घेराबिच मतदान प्रक्रिया सुरु भएको हो ।
अब बुधबार बिहानसम्म मत परिणाम सार्वजनिक भइसक्ने निर्वाचन समितिले जानकारी दिएको छ ।
अधिवेशनको बन्दसत्र आइतबार सुरु भएर सोमबारमात्र राजनीतिक तथा सांगठनिक र आर्थिक प्रतिवेदन पारित भएको थियो । जम्मा ९२९ मतदाता रहेकोमा विभिन्न पदका लागि सोमबार साँझ ६८० जनाले उमेदवारी फाराम लिएका थिए । त्यसमध्ये ३२९ जनाले विभिन्न पदमा दरखास्त दिएकोमा मंगलबार दिउँसो विभिन्न क्लस्टरका सदस्यमध्ये ४७ जनाले फिर्ता लिएका थिए । चुनावबाट पदाधिकारी र सदस्य ११५ जना र लेखासमितिमा ७ गरी १२२ जना चुनिनेछन् ।
पदाधिकारीमध्ये अध्यक्षमा बैनबहादुर अधिकारी क्षेत्री, माधव बाँस्तोला र विवेक त्रिपाठी प्रतिस्पर्धामा छन । जिल्लाको चुनाव भनिए पनि यहाँ एमालेका नेताद्वय पृथ्वीसुब्बा गुरुङ र खगराज अधिकारी पक्षबीच कडा प्रतिष्पर्धा हुने देखिएको छ ।
एमाले उपमहासचिव गुरुङको समूहबाट अध्यक्षमा माधव बास्तोला छन् । उजी युवा संघ केन्द्रीय कमिटी, एमाले प्रदेश कमिटी हुँदै मैदानमा होमिएका हुन् ।
विद्यार्थीकालीन राजनीतिदेखि हालका सचिव बैनबहादुर क्षेत्रीको राजनीतिक यात्रा पनि लामो छ । सुरुदेखि नै एमाले केन्द्रीय नेता खगराज अधिकारीको विश्वासपात्रको रूपमा उभिँदै आएका छन् ।
अध्यक्षका अर्का प्रत्यासी त्रिपाठी भने गुटगत राजनीतिको अन्त्यका लागि भन्दै उमेदवार बनेको बताएका छन् ।
