काठमाडौं । शिक्षा विज्ञान तथा प्रविधि मन्त्रालयले त्रिभुवन विश्वविद्यालयअन्तर्गत ब्याचलर इन मिडवाइफ्री साइन्स (बीएमएस) र बीएस्सी मिडवाइफ्रीको पाठ्यक्रम एउटै भएको निष्कर्ष निकालेको छ । 

शिक्षामन्त्री सुमना श्रेष्ठसँग शुक्रबार चिकित्सा शिक्षा आयोग, नर्सिङ काउन्सिल, त्रिवि लगायतका पदाधिकारीबीच भएको छलफलले यस्तो निष्कर्ष निकालेको हो । त्रिविअन्तर्गत नर्सिङ क्याम्पस महाराजगञ्जमा अध्ययनरत बीएमएसका विद्यार्थीले पाठ्यक्रम जुधेको भन्दै आन्दोलन गरेका थिए । 

छलफलमा बीएस्सी मिडवाइफ्रीकै पाठ्यक्रम बीएमएसका लागि समेत लागु हुने र सो पाठ्यक्रम त्रिविबाट स्वीकृत भएको त्रिवि उपकुलपति डा. केशरजंग बरालले जानकारी दिएका थिए । साथै पाठ्यक्रमबारे सबै सरोकारवाला निकाय जानकार रहेको पनि छलफलमा बताइएको थियो । दुवै विषय अध्ययन गरेका विद्यार्थीलाई नर्सिङ परिषद्को परीक्षामा सहभागी हुन समस्या नहुने परिषद्ले जनाएको छ । 

यी दुई विषयमा उपाधि भने फरक–फरक हुने बैठकको ठहर छ । पाठ्यक्रमबारे अन्यौलता हटेपछि महाराजगञ्ज नर्सिङ क्याम्पसमा आन्दोलन स्थगित भइ पठनपाठन अघि बढाउन सूचित गरिएको छ ।