काठमाडौं । नेपाल गजल प्रतिष्ठानले अग्रज र अनुज गरी दुई गजलकारलाई पुरस्कार तथा सम्मान प्रदान गर्ने भएको छ ।
प्रतिष्ठानले पहिलो पटक प्रदान गर्न लागेको ‘पद्मिल गजल बहार पुरस्कार तथा सम्मान–२०८०’ गजलकार बूँद रानालाई प्रदान गर्ने भएको छ । त्यस्तै ‘के लत बस्यो मलाई गजल पुरस्कार तथा सम्मान–२०८०’ नवोदित गजलकार विनोद बिम्बितलाई प्रदान गरिनेछ ।
पुरस्कारका साथ गजलकार रानालाई नगद राशि ३५ हजार तथा अर्का गजलकार बिम्बितलाई नगद राशि १५ हजार रुपैयाँ प्रदान गरिने प्रतिष्ठानले जनाएको छ ।
‘पद्मिल गजल बहार पुरस्कार तथा सम्मान’को स्थापना दीपशिखा शर्माले गरेका हुन् भने ‘के लत बस्यो मलाई गजल पुरस्कार तथा सम्मान’को स्थापना प्रदीपकुमार मैनालीले गरेका हुन् ।
दुवै पुरस्कार तथा सम्मान प्रतिष्ठानले वार्षिक उत्सवको अवसर पारेर यही चैत १७ गते समर्पण गरिनेछ । सोही दिन प्रतिष्ठानले सांगीतिक गजल गुञ्जन कार्यक्रमको आयोजना गर्नेछ ।