विराटनगर । विराट गोल्डकप फुटबल प्रतियोगिता यही चैत १५ देखि २४ गतेसम्म आयोजना हुने भएको छ । विराटनगरको सहिद रंगशालामा सञ्चालन हुने प्रतियोगितामा भुटान, भारत र नेपालका १० वटा टिम सहभागी हुने आयोगक विराट गोल्डकप ट्रस्टले जनाएको छ ।

मंगलबार पत्रकार सम्मेलनमा आयोजक समितिका अध्यक्ष किशोर शाहीले प्रतियोगिता सहिद रंगशालामा फ्लड लाइटमा डे–नाइट खेलाइने बताए ।

प्रतियोगितामा विजेताले विजेताले ११ लाख र उपविजेताले पाँच लाख रुपैयाँ प्राप्त गर्नेछन् । अघिल्लो वर्ष विजेताले २० लाख ५१ हजार र उपविजेताले १० लाख ५१ हजार रुपैयाँ पुरस्कार प्रप्त गरेका थिए । 

विराटनगरमा वि.सं २०१८ सालदेखि तत्कालीन राजा महेन्द्रको नामबाट प्रतियोगिता सुरु भएको थियो । २०६२/०६३ सालको जनआन्दोलनपछि नाम परिवर्तन गरेर २०६८ सालबाट विराट गोल्डकप राखिएको हो । 

गत वर्ष विराटनगर फुटबल क्लब प्रतियोगिताको विजेता बनेको थियो । भारत केरलाको लुका सकर क्लब उपविजेता थियो ।