काठमाडौं । विद्युतीय सिगरेट (भेप)मार्फत गरिएको तस्करीको नौ किलो सुन चोरी प्रकरणमा जोडिएका एक भारतीय नागरिकलाई केन्द्रीय अनुसन्धान ब्युरो (सीआईबी)ले मुद्दा नचलाई छाडेको खुलेको छ ।

भारतको महाराष्ट्रस्थित साङलीथाना आटपाडी घर भई काठमाडौंमा बस्दै आएका नन्दकुमार पाडुरङ मरगलेलाई सीआईबीले मुद्दा नचलाई छाडेको सुन तस्करीसम्बन्धी जाँचबुझ आयोगको प्रतिवेदनमा उल्लेख छ । ६० किलो सुन तस्करी प्रकरणमा जोडिएका जीवन चलाउनेलाई आर्थिक प्रभावमा परेर मुद्दा नचलाई छाडेको सीआईबीले यसअघिदेखि नै आरोप खेपिरहेको छ ।

भेपको सुन बिक्री–वितरणमा संलग्न नन्दकुमारका भाइ ३९ वर्षीय साहेबराव पाडुरङ मरगलेलाई भने सीआईबी टोलीले पक्राउ गरेको थियो । उनी हाल पुर्पक्षका लागि जेल चलान भएका छन् । भेपको सुन चोरी गरी मरगले दाजुभाइले बिक्री गरेको खुलेको थियो ।

साहेबरावले चोरीको सुन बिक्रीमा दाइ नन्दकुमारको संलग्नता रहेको बयान सीआईबीसमक्ष दिएका थिए । तर, सीआईबीले नन्दकुमारलाई प्रतिवादी समेत बनाएन । अनुसन्धानमा संलग्न एक अधिकारीले भने, “घटना सार्वजनिक हुनासाथ नन्दकुमार भागिसकेका थिए, हाम्रो सम्पर्कमै आएका छैनन् ।”

• महराबाहेक पाँचजनालाई पक्राउ गर्दै प्रहरी

०७९ पुस १० गते चिनियाँ नागरिक ली हानसोङले फ्लाई दुबईको उडानमार्फत ७३ बट्टामा ल्याएको ७३० थान भेपमा नौ किलो सुन भेटिएको थियो । उक्त सुन भन्सारमा रोकिएपछि त्यहीँका कर्मचारीको मिलोमतोमा चोरी गरेर बिक्री गरिएको थियो । सुन भने प्रहरीले बरामद गरेको छैन ।

भेपको सुन तस्करी प्रकरणमा प्रहरीले सुरुमा नौ र पछि राहुल महरासहित तीनजनालाई प्रतिवादी बनाएको थियो ।

६० किलो सुन तस्करीमा मुछिएका बर्दियाको गेरुवा गाउँपालिका–४ घर भई काठमाडौंको चुनदेवीमा बस्दै आएका ३८ वर्षीय जीवन चलाउनेलाई जोगाउन पैसाको ‘बार्गेनिङ’ गरिएको आयोगको प्रतिवेदनमा उल्लेख छ । आयोगको प्रतिवेदनका आधारमा सरकारले सीआईबीका प्रमुख एवं एआईजी किरण बज्राचार्यालाई त्यहाँबाट हटाइसकेको छ ।

यस्तै, सुन तस्करी प्रकरणको अनुसन्धान गर्ने सीआईबीका तत्कालीन एसपी सञ्जय थापा र डीएसपी दुर्गा दाहाललाई हेडक्वार्टर तानिएको छ ।