काठमाडौं । राष्ट्रिय स्वतन्त्र पार्टी (रास्वपा)का उपसभापति डा. स्वर्णिम वाग्लेले वस्तुगत धरातलमा आधारित भएर आउँदो आर्थिक वर्षको बजेट ल्याउन अर्थमन्त्रीलाई सुझाव दिएका छन् । बिहीबार प्रतिनिधिसभा बैठकमा बजेटका प्राथामिकता र सिद्धान्तमाथि छलफलमा भाग लिँदै उनले यस्तो सुझाव दिएका हुन् ।

उनले पछिल्लो समय मुलुकको सार्वजनिक वित्तमा संकट देखिएको भन्दै यो विषयमा सरकार गम्भीर हुन आवश्यक रहेको औँल्याए । चालु आर्थिक वर्षको आठ महिनाको वित्तीय अवस्था दयनीय रहेको उनले बताए ।

चालु आर्थिक वर्षको आठ महिनामा आठ खर्ब रुपैयाँ खर्च रहेको उनले उल्लेख गरे । चालुतर्फ पाँच खर्ब ८२ अर्ब, पुँजीगततर्फ ८१ अर्ब र वित्तीय व्यवस्थापन खर्च एक खर्ब ३८ अर्ब रुपैयाँ रहेको उनले बताए ।

राजस्व संकलन ६ खर्ब ३९ अर्ब रुपैयाँ रहेको भन्दै उनले लक्ष्य पूरा गर्न नसक्ने अवस्थाबारे सचेत गराए । उनले निवर्तमान अर्थमन्त्री डा. प्रकाशशरण महत आठ महिनामा बजेट कार्यान्वयन गर्न नसक्ने असफल अर्थमन्त्रीका रूपमा प्रस्तुत भएको जिकिर गरे ।

उनले गत वर्ष आफूले अर्थमन्त्रीलाई भनेका कुरा सत्य सावित भएको बताए । सरकारको सार्वजनिक वित्तको अवस्था खराब भएकाले सुधारका निम्ति गम्भीर हुन आवश्यक रहेकामा उनले जोड दिए ।

उनले आउँदो बजेटमा सरकारले विकासलाई स्पष्ट प्राथमिकता निर्धारण गर्नुपर्ने धारणा राखे । बजेटको सिद्धान्त र प्राथमिकता छरिएको र विकासको स्पष्ट सोच नभएको उनले टिप्पणी गरे ।

उनले दिगो विकासका लक्ष्यसहित मुलुक निर्माणको स्पष्ट गन्तव्य तर्जुमा गर्नुपर्ने बताए । औद्योगिकीकरण र हरित अर्थतन्त्रमा ध्यान दिँदै अर्थतन्त्रमा सुधारका निम्ति आँट र अठोट सरकारसँग हुनुपर्ने उनले उल्लेख गरे ।

बजेटको सिद्धान्त र प्राथमिकतालाई पुनर्लेखन नगर्दा पनि हुने भन्दै उनले नीति तथा कार्यक्रम र बजेट वास्तविक धरातलका आधारमा ल्याउन सुझाव दिए । न्युज एजेन्सी नेपाल