काठमाडौं । नेपाल मजदुर किसान पार्टी (नेमकिपा)का सांसद प्रेम सुवालले सहरमा बसेर गाउँका सोझा जनता झुक्याउने नेताहरूको घर राष्ट्रियकरण गर्नुपर्ने बताएका छन् । बिहीबार प्रतिनिधिसभा बैठकमा नेता, सांसद र मन्त्री हुँन गाउँका जनतालाई ढाँटेर आफू सहरमा रमाउने भन्दै अब यस्तो राजनीतिले नचल्ने बताएका हुन् ।

उनले खोला छेउमा जग्गा किनेर मिच्दा पनि समस्या निम्तिएको बताए । “खोलाको छेउमा चार आना जग्गा किन्यो चार रोपनी घेरा हाल्यो । यसरी पनि देश विकास हुन्छ ? अनि चुनावमा चाहिँ यो निर्वाचन क्षेत्र म स्वर्ग बनाइदिन्छु रे, उसको घर कहाँ हुन्छ ? कि संघको राजधानीमा कि प्रदेशको राजधानीमा,” उनले भने, “आफ्नो आफ्नो जिल्ला विकास गर्ने, आफ्नो ठाउँमा बस्ने । ज–जस्ले घर बनाउनु भएको छ । उहाँहरूको राष्ट्रियकरण गर्नुपर्छ । यो सरकारले गर्न सक्नुपर्छ ।”

प्रधानमन्त्री र मन्त्रीले गलत राजनीति गरिरहेको पनि बताए । “प्रधानमन्त्री मन्त्रीहरूबाट नै गलत राजनीति भएको छ । सच्याउने गरी विधेयकमा आउनुपर्छ,” उनले भने ।