काठमाडौं । सामाजिक अभियन्ता डा. गोविन्द केसीले व्यवसायी दुर्गा प्रसाईंमाथि कारबाही नभए आन्दोलन सुरु गर्ने चेतावनी सरकारलाई दिएका छन् । 

डा. केसीले बिहीबार विज्ञप्ति जारी गर्दै प्रसाईं जस्ता व्यक्तिलाई तुरुन्त कानुनअनुसार कारबाही गर्न तथा संक्रमणकालीन न्याय टुग्याउँदै जघन्य र मानवताविरोधी अपराधका दोषीहरूलाई दण्डित गर्न पनि माग गरेका छन् । 

माइतीघर मण्डला लगायतका ठाउँहरूको निषेधित क्षेत्र हटाउनेलगायत स्वास्थ्य र मेडिकल शिक्षा सुधारका लागि विगतमा आफूसँग भएका अन्य सम्झौताहरू शीघ्र कार्यान्वयन गर्न डा. केसीले सरकारको ध्यानाकर्षण समेत गरेका छन् । “अन्यथा कुनै पनि बेला सत्याग्रहसहितको आन्दोलनका कार्यक्रम सुरु गर्न सक्ने जानकारी पनि गराउन चाहन्छौँ,” डा. केसीले विज्ञप्तिमा भनेका छन् । 

लामो समयदेखि स्वास्थ्य र मेडिकल शिक्षामा सुधार, सबै नागरिकको स्वास्थ्य सेवा पाउने अधिकार तथा विद्यार्थीहरूको योग्यताका आधारमा निःशुल्क वा न्यूनतम शुल्कमा मेडिकल शिक्षाका कोर्सहरू पढ्न पाउने अधिकार, न्याय र सुशासनका लागि आफू निरन्तर लडिरहेको उनले बताएका छन् । 

यसक्रममा केही उपलब्धिहरू हासिल भएता पनि आफूहरूसित भएका सम्झौताहरू कार्यान्वयन गर्न रोकेको आरोप उनले लगाएका छन् । “यही पृष्ठभूमिमा दुर्गा प्रसाईं नामक उच्छृंखल र अराजक व्यक्तिले स्वास्थ्य र मेडिकल शिक्षा क्षेत्र सुधारको अभियानमा लागेका मानिसहरूलाई ‘मरुन्’ भनेर सार्वजनिक रूपमा भनिरहेका छन् । र अहिले पनि निरन्तर अभियन्ताहरूलाई दुव्र्यवहार गर्ने र धम्की दिने काम गरिरहेका छन्,” विज्ञप्तिमा डा. केसीले भनेका छन् । 

चिकित्सा शिक्षा सुधारको प्रयासबारे झुटा कुराहरू फैलाउने, नाजायज आरोपहरू लगाउने र अभियन्ताहरूको नामै तोकेर निन्दा गर्ने र धम्की दिने काम भइरहेकोमा उनले चिन्ता व्यक्त गरेका छन् । यस्ता कार्यले आफूहरूको सुरक्षामा आँच आएको दाबी उनले गरेका छन् ।

“हिजोका दिनमा तिनै व्यक्तिले चिकित्सा शिक्षा आयोगका पदाधिकारीहरूलाई धम्की दिने, उनीहरू चढेको गाडीमा ढुंगा हान्न लगाउने, घरको छेउमा बम राखेर आतंक फैलाउनेजस्ता आपराधिक क्रियाकलाप गरेका थिए,” विज्ञप्तिमा भनिएको छ । 
अभियन्ताहरूमाथि लागेका सबै खाले आरोपहरूको निस्पक्ष छानबिन गर्न र दोषी देखिएमा कारबाही गर्न डा.केसीले माग गरेका छन् । 

कुनै पनि निजी शिक्षण संस्था मापदण्ड र प्रक्रिया पुर्‍याएर आउँछ भने त्यसमा आफूहरूलाई कुनै आपत्ति नहुने उनले स्पष्ट पारेका छन् । तर, स्वास्थ्य जस्तो संवेदनशील क्षेत्रमा नियम कानुन मिचेर वा व्यक्ति विशेषका लागि नीतिगत भ्रष्टाचारमार्फत निजी संस्था खोल्ने काम आफूहरूलाई कुनै पनि हालतमा स्वीकार्य नहुने उनले बताएका छन् । 

“यो सब भइरहँदा पार्टीका नेताहरूले तिनै उच्छृंखल र अराजक व्यक्तिलाई छोरा वा नाति बनाउँदै संरक्षण गरिरहेका थिए । त्यही दण्डहीनताको परिणामस्वरुप अहिले ती व्यक्तिको अराजकता झनै बढ्दै गएर कानुनी शासनलाई चुनौती बनिरहेको छ,” डा. केसीले भनेका छन् ।