काठमाडौं । सुन तस्करीबारे छानबिन गर्न गठित जाँचबुझ आयोगले प्रतिवेदन बुझाएको छ । आयोग गठन भएको पाँच महिनापछि बिहीबार उपप्रधान एवं गृहमन्त्री रवि लामिछानेलाई प्रतिवेदन बुझाइएको हो ।

आयोगका अध्यक्ष डिल्लीराज आचार्य नेतृत्वको टोलीले ४८५ पृष्ठ लामो प्रतिवेदन बुझाएको आयोगका अध्यक्ष आचार्यले जानकारी दिए ।

हङकङबाट तस्करी गरेर ल्याइएको ६० किलो र इलेक्ट्रिक चुरोट ‘भेप’मा लुकाएर दुबईबाट ल्याइएको सुनबारे आयोगले छानबिन गरेको थियो । आयोगका पदाधिकारीले ६० जनाभन्दा बढीसँग सोधपुछ गरेका थिए ।

गएको असोज १४ गते सरकारले सुनको अवैध पैठारी (तस्करी) नियन्त्रणसम्बन्धी जाँचबुझ आयोग गठन गरेको थियो ।

आयोगका सदस्यमा पूर्वप्रहरी अतिरिक्त महानिरीक्षक सहकुलबहादुर थापा, पूर्वसहसचिव किशोरजंग कार्की र पूर्वसहसचिव प्रेमराज जोशी थिए । आयोगले सुन तस्करी रोकथामका निम्ति केही नीतिगत सुधार र सुन तस्करी प्रकरणमा पटक–पटक मुछिएकाहरूको अभिलेखीकण समेत गरेको छ ।