काठमाडौं । सरकारमा सहभागिता र मन्त्री पठाउने विषयमा छलफल नगरिएको भन्दै राष्ट्रिय स्वतन्त्र पार्टी (रास्वपा)मा असन्तुष्टि व्यक्त गरिएको छ । सोमबार चःमतीमा बसेको पार्टी केन्द्रीय समितिको बैठकमा असन्तुष्टि व्यक्त गरिएको एक नेताले बताए ।

बैठकमा सहभागी ती नेताका अनुसार, नयाँ भनिए पनि निर्णय प्रक्रिया पुराना दलको जस्तै भएको भन्दै केन्द्रीय नेताहरूले आपत्ति जनाएका थिए ।

“प्रक्रियामा प्रश्न उठ्यो । केन्द्रीय समितिमा छलफल नगरी किन सरकारमा गएको‚ मन्त्री पठाउँदा किन छलफल नगरेको भन्दै आवाज उठेको छ‚” ती नेताले बाह्रखरीसित भने ।

केन्द्रीय नेताले आवाज उठाएपछि सभापति रवि लामिछाने र उपसभापति स्वर्णिम वाग्लेले सरकारमा सहभागितालाई अवसरको दृष्टिबाट हेरिनुपर्ने तर्क गरेका थिए । अवसर सदुपयोग गर्ने निर्णयमा पुगेको भन्दै उनीहरूले जनताको पक्षमा काम गरेर देखाउने वाचा गरेका ती नेताले जानकारी दिए ।

इलाम क्षेत्र नम्बर–२ मा रास्वपाको माहोल राम्रो भएको र उपनिर्वाचन जित्न सकिने जिल्ला पुगेर आएका ६ नेताले बैठकमा ‘बिफ्रिङ’ गरेका थिए । स्थानीय उमेदवारलाई प्राथमिकता दिनुपर्ने भन्दै उनीहरूले माहोल पार्टीको पक्षमा भएको बताएका थिए ।

उमेदवार छनोटबारे महामन्त्री मुकुल ढकाल‚ सहमहामन्त्री कविन्द्र बुर्लाकोटीलगायत नेताले छलफल गरेर अर्को बैठकमा प्रस्तुत गर्ने सहमति भएको ती नेताले जानकारी दिए ।