काठमाडौं । रुसी सेनामा भर्ती भएका चार जना नेपालीले उद्धारका लागि भारत सरकारसँग गुहार मागेको एक भिडियो सन्देश सार्वजनिक भएको छ । हिन्दीमा सम्बोधन गरेका उनीहरूले नेपालबाट सहयोग नपाएको गुनासो गर्दै भारत सरकारलाई उद्धार गरिदिन आग्रह गरेका छन् ।

सञ्जय, राम, सन्तोष र कुमार श्रेष्ठ नाम गरेका युवाहरूको भिडियो सन्देशलाई 'द वायर'ले पोस्ट गरेको छ । द वायरका अनुसार उनीहरूले युक्रेनको दोनेत्स्कबाट भिडियो सन्देश पठाएका हुन् ।

"हामीसँग तीनजना भारतीय साथी थिए, उनीहरूलाई भारतले फिर्ता लगिसक्यो । तर, हाम्रो दूतावासबाट कुनै पनि सहयोग भइरहेको छैन, हाम्रो देशबाट केही पनि लागेको छैन," उनीहरूले भनेका छन् ।

आफूहरू भारतले उद्धार गरिदिनेमा निकै आशावादी रहेको उनीहरूको भनाइ छ । भारत र भारतीय दूतावास बलियो रहेकाले आफूहरूको उद्धार हुने उनीहरूको विश्वास छ ।

"भारतले हामीलाई सहयोग गर्नेमा हामी निकै आशावादी छौँ । हामीलाई विश्वास छ, भारतले हामीलाई निराश पार्ने छैन । किनकि नेपाल र भारतबीच निकै राम्रो सम्बन्ध छ । त्यसले हामीले तपाईंसँग सहयोग मागिरहेका छौँ । किनकि तपाईंहरूको दूतावास पनि बलियो छ, देश पनि बलियो छ । हाम्रो नेपालबाट केही पनि हुन सकिरहेको छ," भिडियोमा भनिएको छ ।

उनीहरूले सुरुमा आफूहरूसँग ३० जना रहेकोमा अहिले पाँच जनामात्र रहेको पनि बताएका छन् ।

उनीहरूले के भनेका छन् भिडियोमा ?

हामी अहिले रुसी आर्मीमा छौँ । हामी हाम्रो देश नेपालबाट आएका हौँ । तर, अहिले हामीलाई निकै समस्या भइरहेको छ । एजेन्टले हामीलाई झुट बोलेर यहाँ पठाएको हो । एजेन्टले हामीलाई रुसी आर्मीको हेल्परका लागि भनेर पठाएको थियो । तर, यहाँ आएर हामीले युद्धमा लड्न परिरहेको छ ।

हामीसँग तीजना भारतीय साथी थिए, उनीहरूलाई भारतले फिर्ता लगिसक्यो । तर, हाम्रो दूतावासबाट कुनै पनि सहयोग भइरहेको छैन, हाम्रो देशबाट केही पनि लागेको छैन ।

त्यसैले हामी हाम्रो छिमेकी देश भारतसँग सहयोग माग्न चाहन्छौँ । भारतले हामीलाई सहयोग गर्नेमा हामी निकै आशावादी छौँ । हामीलाई विश्वास छ, भारतले हामीलाई निराश पार्ने छैन । किनकि नेपाल र भारतबीच निकै राम्रो सम्बन्ध छ । त्यसले हामीले तपाईंसँग सहयोग मागिरहेका छौँ । किनकि तपाईंहरूको दूतावास पनि बलियो छ, देश पनि बलियो छ । हाम्रो नेपालबाट केही पनि हुन सकिरहेको छ ।

यहाँ रहेका हामी सबै नेपालीहरू घर फर्किन चाहन्छन्, हामीसँग फ्रड भएको छ । हामीलाई सहयोगीका लागि भनेर पठाइएको थियो, युद्धमा जानुपरिरहेको छ । हामी ३० जना थियौँ, तर अहिले हामी पाँचजना मात्र बाँकी छौँ । कसैलाई कहाँ पठाइएको छ, कोही घाइते छन् ।

हामी तपाईंसँग सहयोग माग्न खोजिरहेका छौँ । सक्नुहुन्छ भने हामीलाई पनि यहाँबाट निकाल्नुहोस् । नमस्कार ।