विराटनगर । उद्योग संगठन मोरङको आयोजनामा द्विदेशीय उद्योग व्यवसायको प्रवर्धनबारे बंगलादेशका राजदूतसँग विराटनगरमा छलफल भएको छ । उद्योग, व्यापार तथा पर्यटन क्षेत्रमा हुन सक्ने सहकार्य तथा साझेदारीको सम्भावना विषयमा नेपालका लागि बंगलादेशका राजदूत सलाहउद्दिन नोमन चौधरीसँग आइतबार छलफल भएको हो ।

संगठनको सचिवालयमा भएको छलफलमा अध्यक्ष राकेश सुरानाले नेपाल र बंगलादेशबीचको व्यापारिक सम्वन्ध अभिवृद्धिका लागि नेपाली उत्पादनले बंगलादेश निर्यातमा भोग्दै आएको समस्या अवगत गराए ।

उनले भने, “समस्या समाधान गर्न सहजीकरण हुनसके दुवै देशको व्यापार प्रवर्धनमा फाइदा पुग्न सक्छ ।”

अध्यक्ष सुरानाले बंगलादेशस्थित व्यावसायिक संस्था तथा औद्योगिक पक्षहरूसँग संस्थागत सम्बन्ध विस्तारमा जोड दिए । साथै संगठनले आयोजना गर्न लागेको अन्तर्राष्ट्रिय व्यापार प्रवर्धन र्‍‍यालीमा बंगलादेशका उद्योगीहरूबीच सम्बन्ध विस्तारमा आवश्यक सहजीकरण गर्नसमेत आग्रह गरे ।

राजदूत चौधरीले नेपाल र बंगलादेशबीच धेरै क्षेत्रहरूमा सहकार्यको प्रचुर सम्भावना रहेको बताए ।

“दुई मुलकका औद्योगिक तथा व्यवसायीहरूबीचको सम्बन्ध विस्तारका लागि दूतावास निरन्तर सहजीकरण गर्न तत्पर छ,” उनले भने, “निर्यातमा देखिएका समस्या समाधान गर्न मेरो तर्फबाट पहल र प्रयास रहने छ ।”

राजदूत चौधरीले द्विपक्षीय व्यापारिक हितका लागि संगठनले अन्तर्राष्ट्रियस्तरको र्‍याली आयोजना गर्न लागेकोमा खुसी व्यक्त गरे ।