काठमाडौं । सत्ता समीकरण अदलबदल भएसँगै नेपाली कांग्रेस फेरि एकपटक प्रतिपक्षमा पुगेको छ । फागुन २१ गते 'अचानक' प्रधानमन्त्री पुष्पकमदल दाहाल 'प्रचण्ड'ले समीकरण फेरेपछि कांग्रेस प्रतिपक्षको बेन्चमा पुगेको हो ।

नेकपा (माओवादी केन्द्र)को नेतृत्वमा नयाँ गठबन्धन बनिसकेको छ । सत्ता गठबन्धनमा मा‌ओवादीसहित नेकपा (एमाले), राष्ट्रिय स्वतन्त्र पार्टी (रास्वपा), नेकपा (एकीकृत समाजवादी) छन् । ती दलहरूबाट बनेका मन्त्रीहरूले बुधबार शपथ लिएर पदभार ग्रहण गरिसकेका छन् ।

यसका बाबजुद कांग्रेस नेताहरूले भने वैकल्पिक गठबन्धन बनाउन कसरत गरे । बुधबार बिहानमात्र पत्नी आरजु राणालाई लिएर कांग्रेस सभापति शेरबहादुर देउवा माधव नेपाललाई भेट्न कोटेश्वर पुगेका थिए । त्यतिबेला कांग्रेस नेता रमेश लेखकले छलफल सकारात्मक रहेको प्रतिक्रिया दिएका थिए ।

तर, बुधबार साँझसम्म एकीकृत समाजवादी दुईवटा मन्त्रालय लिएर सत्ता गठबन्धनमा सामेल भइसकेको छ ।

यस्तो अवस्थामा कांग्रेसले संसद्‌मा प्रतिनिधित्व गर्ने साना दलहरूसँग संवाद थालेको छ । बुधबार अपराह्न कांग्रेस नेताहरूले देउवा निवास बूढानीलकण्ठमा लोकतान्त्रिक समाजवादी पार्टी (लोसपा)का अध्यक्ष महन्थ ठाकुर, जनमत पार्टीका अध्यक्ष डा. सीके राउत र नागरिक उन्मुक्ति पार्टीका अध्यक्ष रेशम चौधरीलाई बोलाएर छलफल गरेका छन् । 

कांग्रेसबाट सभापति देउवासहित उपसभापति पूर्णबहादुर खड्का, महामन्त्री गगन थापा, नेताहरू शेखर कोइराला र रमेश लेखक सहभागी थिए ।

बैठकपछि कांग्रेस महामन्त्री थापाले आफूहरूले सामूहिकरूपमा प्रतिपक्षमा बस्ने समझदारी गरेको दाबी गरे ।

“हामी सत्ता गठबन्धनका साझेदारहरू छलफलमा बसेका हौँ । गठबन्धन छोड्ने यत्रो ठूलो निर्णय गर्दा प्रधानमन्त्रीजीले एकपटक पनि गठबन्धनका दलसँग छलफल गर्नुभएन । यो उहाँले गठबन्धनमाथि गरेको ‘धोकाधडी’ हो भन्ने निष्कर्ष रह्यो,” थापाले बाह्रखरीसँग भने, “त्यसैले सामूहिकरूपमा प्रतिपक्षमा बसेर खबरदारी गर्ने समझदारी भएको छ ।”

उनका अनुसार तत्कालीन सत्ता गठबन्धनमा आबद्ध दलका शीर्ष नेताहरूको बैठकले निर्वाचन अघिदेखि बनेको गठबन्धन तोड्दा प्रचण्डले सहयात्री दलसँग एकपटक पनि छलफल नगर्नु ‘धोकाधडी’ भएको निष्कर्ष निकालेको छ ।

तर, बैठकमा सहभागी जनमत पार्टीका अध्यक्ष सीके राउत नयाँ समीकरणका लागि मार्ग प्रशस्त भएको बताउँछन् । यद्यपि, तत्काल सरकार निर्माणको आधार नदेखिएको उनको भनाइ छ ।

“नयाँ लोकतान्त्रिक गठबन्धन निर्माणको बाटो खुला भए पनि सत्ता र शक्ति केन्द्रको संयुक्त स्वार्थमा संख्या घटिरहेको छ । त्यसैले तत्कालका लागि सरका निर्माण गर्ने सम्भावना कमजोर भएको छ,” उनले भने, “तर, सरकार गठनको मात्र कुरा नभएकाले भोलिका दिनमा पनि लोकतान्त्रिक शक्तिहरूबीचको सहकार्य विस्तारित हुँदै जानेछ ।”