काठमाडौं । उपेन्द्र यादवको नेतृत्वमा सरकारमा जाने तयारीमा जनता समाजवादी पार्टी (जसपा) नेपालले निर्णय गरिसकेको छ । तर, कति र कुन कुन मन्त्रालय लिएर सरकारमा जाने भन्ने निर्णय भने गरिसकेको छैन । 

जसपा गठबन्धनमा सिट बाँडफाँट भएपश्चात् मात्र मन्त्रालयको टुंगो लगाउने तयारीमा छ । यसका लागि आज बस्ने गठबन्धन दलको बैठकमा पार्टीको चासो भएको पार्टी प्रमुख सचेतक प्रदीप यादवले जानकारी दिए । 

“पहिले गठबन्धनको बैठक बसेर सिट बाँडफाँटको टुंगो लगाएपछि मात्र कति र कुन मन्त्रालय भन्ने टुंगो लाग्छ । त्यसपश्चात् मात्र कसलाई कुन मन्त्रालयमा पठाउने निर्णय पार्टीले गर्नेछ,” उनले भने । 

यादवका अनुसार पार्टीले कति र कुन मन्त्रालय लिएर सरकारमा जाने भन्ने निर्णय लिइसकेको छैन । यसका लागि पार्टीले केन्द्रीय कार्यकारिणी बैठक बोलाएको छ । “हामीले केन्द्रीय कार्यकारिणी बैठक बोलाएका छौँ । उक्त बैठकले टुंगो लगाउनेछ,” उनले थपे । 

जसपाले तीन मन्त्रालय पाउनुपर्ने गठबन्धनमा दाबी गरेको छ । चर्चाअनुसार उपेन्द्र यादवले उपप्रधानसहित परराष्ट्र मन्त्रालयको दाबी गरेका छन् ।

जसपाले मधेसको मुख्यमन्त्रीमा आफ्नो पार्टीको निरन्तरता चाहेको छ । सोही विषयको सुनिश्चितता नहुँदासम्म जसपाले मन्त्री नपठाएको नेताहरू बताउँछन् ।