काठमाडौं । साफ यू–१६ महिला च्याम्पियनसिपको आफ्नो दोस्रो खेलमा आज भुटानविरुद्ध मैदानमा उत्रँदा घरेलु टिम नेपाल पहिलो जितको खोजीमा हुनेछ ।

प्रतियोगिताको पहिलो खेलमा नेपालले बंगलादेशसँग २–० को हार व्यहोरेको थियो । फाइनलमा पुग्ने सम्भावनालाई कायम राख्न आज नेपाललाई जित्नैपर्ने दबाब छ ।

प्रतियोगितामा भुटानको पनि यो दोस्रो खेल हो । पहिलो खेलमा भुटानले भारतसँग ७–० को फराकिलो हार व्यहोरेको थियो ।

सातदोबाटोस्थित एन्फा मुख्यालयमा नेपाल र भुटानबीचको खेल दिउँसो ३ बजे सुरु हुनेछ ।

यसपछि नेपालले बिहीबार लिग चरणको अन्तिम खेलमा भारतसँग प्रतिस्पर्धा गर्नेछ । नेपाल, भुटान, भारत र बंगलादेश गरी चार टिम सहभागी प्रतियोगिता सिंगल राउन्ड रोबिन पद्धतिमा सञ्चालित छ । लिग चरणका शीर्ष दुई टिम उपाधिका निम्ति भिडनेछन् ।