काठमाडौं । फिल फोडेनको दुई गोलप्रेरित म्यानचेस्टर सिटीले ‘म्यानचेस्टर डर्बी’मा म्यानचेस्टर युनाइटेडविरुद्ध ३–१ को पुनरागमन जित निकालेको छ ।

आइतबार घरेलु मैदान इत्तिहाद रंगशालामा सिटी पहिलो हाफमा १–० ले पछि परेको थियो । तर, दोस्रो हाफमा फोडेन चम्कँदा सिटीले पुनरागमन जितसहित शीर्ष स्थानको लिभरपुलसँगको अंक दूरी घटाएको हो ।

खेलको आठौँ मिनेटमा मार्कुस रासफोर्डले गरेको गोलबाट युनाइटेडले अग्रता बनाएको थियो । ५६औँ मिनेटमा फोडेनले घरेलु टिमका निम्ति बराबरी गोल गरे । ८०औँ मिनेटमा फोडेनले नै गोल गर्दै सिटीलाई २–१ को अग्रतामा राखे । इन्ज्युरी समयमा एर्लिङ हाल्यान्डले गोल गरेपछि सिटीले ३–१ को जित निश्चित गरेको हो ।

जितसँगै २७ खेलबाट ६२ अंक जोडेको सिटीले शीर्ष स्थानको लिभरपुलसँगको दूरी एक अंकमा झारेको छ । समान खेलबाट ६३ अंकसहित योर्गान क्लोपको टोली तालिकाको शीर्ष स्थानमा छ । २७ खेलबाटै ४४ अंकको युनाइटेड छैटौँ स्थानमा छ ।