काठमाडौं । पछिल्लो समय बैंकरमाथि ‘आक्रमण’ भइरहेको नेपाल बैंकर्स संघका पदाधिकारीले बताएका छन् । प्रतिनिधिसभाअन्तर्गतको अर्थ समितिको आइतबारको बैठकमा उनीहरूले सोबारे जानकारी गराएका हुन् ।

बैठकमा नेपाल राष्ट्र बैंकका गभर्नर महाप्रसाद अधिकारी, बैंकर्स संघका अध्यक्ष सुनील केसी, निर्वतमान अध्यक्ष ज्ञानेन्द्र ढुंगाना, प्रभु बैंकका प्रमुख कार्यकारी अधिकृत अशोक शेरचन समेत उपस्थित थिए ।

अध्यक्ष केसीले पछिल्लो समय बैंकिङ क्षेत्रमाथि अनेक ‘प्रहार’ गरिएको बताए । यसले समस्या निम्त्याउन सक्ने उनको भनाइ छ ।

“पछिल्लो समय हामीमाथि विभिन्न किसिमले प्रहार भएको छ । यसले स्टाब्लिस्ट भएको बैंकिङ क्षेत्र बिग्रेर जाँदा भोलिको दिनमा अर्थतन्त्रमा पनि प्रभाव पार्छ,” उनले भने, “बैंकिङ सेन्सेटिभ सेक्टर हो । अहिले नेपालमा विदेशी लगानी नभित्रिएको अवस्था छ । साउथ एसियामा नै नेपाल सबैभन्दा कम लगानी भित्र्याउने लिस्टमा छ । बैंकिङ क्षेत्रमा यसरी आक्रमण हुँदा त्यसको नकारात्मक प्रभाव वैदेशिक लगानीमा पनि पर्छ ।”

अहिलेको ‘अराजकता’लाई तुरुन्त रोक्नुपर्नेमा उनले जोड दिए । ऋण उठाउन पनि अहिलेको अवस्थामा समस्या भएको उनले बताए । नेपालको बैंकिङ ‘प्रोडक्ट’ अरू देशको तुलनामा सस्तो रहेको उनले उल्लेख गरे ।

पाँच दिनयता १० बैंकर थुनामा रहेका भन्दै उनले त्यसले त्रास सिर्जना गरेको सुनाए । “हाम्रो नियामक निकाय नेपाल राष्ट्र बैंक हो । राष्ट्र बैंकको निर्देशनमा हामी चलेका छौँ । त्यहाँ पनि जानकारी नगराईकन एकैपटक प्रहरीबाट पक्राउ गरी स्टाफहरूलाई लिएर जाँदाखेरि हाम्रा ८६ हजार स्टाफहरू आतंकित भएका छन्,” उनले भने, “असुरक्षित फिल गरेका छन् । किनभने, हामी लोन दिनै सक्दैनौँ भन्दै छन् । लोन दिन साइन गर्नुपर्छ । आजभन्दा चार वर्ष पहिले हामीले लोन दियौँ, त्यतिखेर हेर्दा सबै कन्डिसन ठिक थियो । तर, चार वर्षपछि धेरै कुराहरू परिवर्तन भएका छन् ।”

जग्गाको हकमा पनि पहिलेको मूल्यअनुसार अहिले हुन नसक्ने उनले बताए । अहिलेको घटनाले बैंकिङ क्षेत्र अगाडि बढ्न नसक्ने उनको ठहर छ । अनुसन्धानका निम्ति बैंकहरूले सहयोग गर्ने उनले बताए ।

बैंकर्स संघका निवर्तमान अध्यक्ष एवं नबिल बैंकमा सीईओ ढुंगानाले नेपाल प्रहरीको केन्द्रीय अनुसन्धान ब्युरो (सीआईबी)ले बुझ्दै नबुझी बैंकरलाई पक्राउ गरेको जिकिर गरे । धितो भनेर घरजग्गालाई मात्र हेरिएको उनको भनाइ छ ।

“अहिलेको केसमा नेपाल प्रहरीले धितो भनेको घरजग्गा मात्रै हो जस्तो गरेर धितोले नखामेको लोन भनिराखेको छ,” उनले भने, “त्यसो हो भने त हाम्रोजस्तो आयातमुखी देशमा धेरै लोनहरू ट्रेडिङमा होलसेलर, रिटेलर र इम्पोर्टरहरूलाई गएको हुन्छ । जहाँ धितो भनेको सामान मात्रै हुन्छ । भोलि त्यो व्यापार, व्यवसाय डुब्दा धितो केही पनि नहुन सक्छ ।”

निर्माण व्यवसायको हकमा पनि त्यस्तै हुने भन्दै उनले बैंकिङ क्षेत्र नै नबुझी धरपकड गरिएको बताए । अहिले बैंकका कर्मचारीले ऋण शाखामा काम गर्न नपरोस् भनी सरुवा खोज्न थालेको उनले उल्लेख गरे । हाइड्रोपावर क्षेत्रमा पनि खोलाको प्रोजेक्टलाई राखेर अर्बौँ रुपैयाँ ऋण दिने गरिएको उनले बताए ।