काठमाडौं । परराष्ट्रमन्त्री एनपी साउद आज (आइतबार) राति फिनल्यान्ड जाने भएका छन् । उनी दोस्रो यूएन एलडीसी फ्युचर फोरममा सहभागी हुन फिनल्यान्डको हेलसिन्कीतर्फ जान लागेका हुन् ।

‘यूएन एलडीसी फ्युचर फोरम’ यही मार्च ५ देखि ६ सम्म आयोजना हुँदै छ ।

परराष्ट्रमन्त्री साउदले अतिकम विकसित राष्ट्र समूहको ग्लोबल समन्वय ब्युरोको अध्यक्षको रूपमा मार्च ५ मा फोरमको उद्घाटन सत्रलाई सम्बोधन गर्ने परराष्ट्र मन्त्रालयले जनाएको छ ।

अतिकम विकसित राष्ट्रहरू हेर्ने राष्ट्रसंघीय उच्च प्रतिनिधिको कार्यालय, भूपरिवेष्ठित विकासशील राष्ट्रहरू र साना टापु विकासशील राष्ट्रहरू र फिनल्यान्ड सरकारले ‘एलडीसीहरूमा संरचनात्मक रूपान्तरणका लागि नवप्रवर्तन’ भन्ने नाराका साथ यो फोरम आयोजना गर्न लागेको हो ।

फोरमको बहुवर्षीय श्रृङ्खलाले एलडीसीमा संरचनात्मक रूपान्तरण र दिगो विकासलाई बढावा दिन नवविचार, डिजिटलाइजेसन र प्रविधिको प्रयोगको अन्वेषण गर्ने लक्ष्य राखेको छ ।

कार्यक्रम साइडलाइनमा परराष्ट्रमन्त्री साउदले फिनल्यान्डका विदेशमन्त्री एलिना वाल्टोननसँग द्विपक्षीय भेटवार्ता गर्ने कार्यक्रम रहेको परराष्ट्रले जनाएको छ । उनको मार्च ८ मा नेपाल फर्कने कार्यक्रम छ ।