काठमाडौं । रुसी सेनामा भर्ती भई मृत्यु, घाइते, सम्पर्क विहीन र उद्धारको लागि याचना गर्ने नेपालीको संख्या ६ सय नाघेको छ ।  भर्ना भएकालाई छिटो फर्काउन परिवारका सदस्यले सरकारलाई आग्रह गरिरहँदा रुसी सेनामा भर्ती भएका केही नेपाली युवाहरु भने रुसी नागरिकता लिनको लागि फारामसमेत भर्न थालेका छन् । 

“पछिल्लो दुई दिनमा रुसी सेनामा भर्ती भएका थप १०० नेपालीको परिवार हाम्रो सम्पर्कमा आउनु भएको छ । योसँगै रुसी सेनामा भर्ती भएका ६१३ जनाभन्दा बढीका आफन्त हाम्रो सम्पर्कमा हुनुहुन्छ,” रुसी सेनामा भर्ती भएका नेपाली युवाहरुको खोजीमा लागिपरेकी कृतु भण्डारीले बाह्रखरीसँग भनिन् । 

भण्डारीले पछिल्ला केही सातायता रुसी सेनामा भर्ती भई मृत्यु भएका, घाइते भएका, सम्पर्क विहीन रहेका र कार्यरत रही उद्धारको लागि याचना गरिरहेका नेपालीको विवरण संकलन गरिरहेकी छन् । 

उनीले पीडित परिवारलाई एकत्रित गरी रुसी सेनामा भर्ती भएका युवालाई नेपाल फिर्ता ल्याउन सरकारलाई दबाब दिँदै आएकी छन् । 

“दुईदिन अघिसम्म यस्ता ५१३ जना परिवारले हामीलाई सम्पर्क गर्नु भएको थियो । यीमध्ये १६ जना मृत्यु भइसकेका, २१ जना मृत्यु भएको भनिएको तर आधिकारिक पुष्टि हुन नसकेका, ११६ जना घाइते भएका, २७२ जना सम्पर्कविहीन भएका र ८८ जना हाल रुसी सेनामै कार्यरत रहेकाको परिवार हुनुहुन्छ,” भण्डारीले जानकारी दिइन् ।

यसअघि रुसी सेनामा भर्ती भई युक्रेनसँगको युद्धमा मृत्यु भएका, मृत्यु भयो भन्ने अपुष्ट सूचना आएका, रुसी सेनामा भर्ती भएपछि सम्पर्क विहीन भएका, युक्रेनसँगको युद्धमा घाइते भएका र रुसी सेनामा कार्यरत रहेका तर फर्कन चाहेका गरी पाँच थरी परिवारहरु उनको सम्पर्कमा आएका थिए । 

तर पछिल्ला केही दिनयता रुसी सेनामा भर्ती भई त्यहींको नागरिकता लिनको लागि आवेदन दिँदै गरेको नेपाली पनि भण्डारीको सम्पर्कमा आएका छन् । 

“रुसी नागरिकता लिनको लागि आवेदन दिने पाँच नेपालीले हामीलाई सम्पर्क गर्नु भएको छ । उहाँहरुले बाँकी सेवा सुविधा लिनको लागि नागरिकता लिने प्रक्रिया अघि बढाएको हामीलाई जानकारी दिनु भएको छ,” भण्डारीले भनिन् । 

रुसी राष्ट्रपति भ्लादिमिर पुटिनले गत पुस १९ नयाँ आदेश जारी गर्दै रुसका लागि लड्ने विदेशी नागरिकलाई र उसको परिवारलाई रुसी नागरिकता तथा पासपोर्ट प्रदान गर्ने घोषणा गरेका थिए ।  पुटिनले आदेशमा युक्रेनमा ‘विशेष सैन्य अपरेसन’ जारी रहेको समयमा रुसी सेनामा भर्ती हुने विदेशी नागरिक, उसको श्रीमती, छोरा–छोरी र बाबु–आमालाई रुसी नागरिकता प्रदान गर्न अनुमति दिएका हुन् । 

रुसी सेनामा भर्ती हुनेले कम्तिमा एक वर्षको लागि सेनामा रहने सम्झौता गरे उसले र उसका परिवारका सदस्यलाई सुरुमै रुसी नागरिकता प्रदान गरिने र रुस आउन दिने नयाँ घोषणामा उल्लेख छ ।  पुटिनको यो आदेशले नेपालमाथि थप चुनौती थपदिएको छ ।