काठमाडौं । माइकल लेभिट र साइब्रान्ड एन्गलब्रेटको कीर्तिमानी साझेदारीप्रेरित नेदरल्यान्ड्सले त्रिदेशीय ट्वान्टी–२० शृंखलामा नामिबियाविरुद्ध ५९ रनको सहज जित निकालेको छ । 

बिहीबार कीर्तिपुरस्थित त्रिवि क्रिकेट मैदानमा नेदरल्यान्ड्सले प्रस्तुत गरेको २४८ रनको लक्ष्य पछ्याउने क्रममा नामिबियाले निर्धारित २० ओभरमा सात विकेट गुमाएर १८८ रन मात्र बनाउन सक्यो । नेदरल्यान्ड्सले पहिलो इनिङमा बनाएको २४७ रन त्रिवि क्रिकेट मैदानमा भएको ट्वान्टी–२० अन्तर्राष्ट्रिय खेलमा बनेको अहिलेसम्मकै उच्च स्कोर हो । यसअघि, सन् २०२१ मा नेपालले नेदरल्यान्ड्सविरुद्ध २३८ रन बनाउँदै यो उच्च स्कोरको कीर्तिमान राखेको थियो ।

बिहीबार नामिबियाको ब्याटिङमा जान ग्रिन र जान फ्राइलिन्कले समान ४२ रन बनाए । जेपी कोट्जेले २६ रन थप्दा कप्तान जेजे स्मिथ र रुबेन ट्रम्पेलमेनले समान १९ रन जोडे ।

नेदरल्यान्ड्सका टिम भान डेर गुग्टेनले दुई विकेट लिए । साइब्रान्ड एन्गलब्रेट, रोइलोफ भान डेर मेर्वे, भिभियन किग्माल, फ्रेड क्लासेन र आर्यन दत्तले समान एक विकेट लिए ।

त्यसअघि, माइकल लेभिटले कीर्तिमानी ब्याटिङ गरेपछि नेदरल्यान्ड्सले निर्धारित २० ओभरमा पाँच विकेट गुमाएर २४७ रन बनाएको थियो ।

नेदरल्यान्ड्सबाट आक्रामक रूपमा प्रस्तुत भएका लेभिटले ६२ बलमा ११ चौका र १० छक्कासहित १३५ रन बनाए । योसँगै लेभिट ट्वान्टी–२० अन्तर्राष्ट्रिय क्रिकेटमा नेदरल्यान्ड्सका लागि एकै खेलमा उच्च स्कोर बनाउने खेलाडी बने । यो कीर्तिमान यसअघि म्याक्स ओ‘डाडको नाममा थियो । ओ‘डाडले २०२१ अप्रिलमा त्रिवि मैदानमै मलेसियाविरुद्ध १३३ रन बनाउँदै यो कीर्तिमान बनाएका थिए ।

१५–१ को अवस्थाबाट लेभिटले दोस्रो विकेटका निम्ति साइब्रान्ड एन्गलब्रेटसँग १९३ रनको कीर्तिमानी साझेदारी गर्दै नेदरल्यान्ड्सलाई ठूलो योगफलतर्फ अघि बढाएका थिए । ट्वान्टी–२० अन्तर्राष्ट्रिय क्रिकेटमा नेदरल्यान्ड्सले बनाएको यो अहिलेसम्मको सबैभन्दा ठूलो साझेदारी हो । कीर्तिपुरमै यसअघि ओ‘डाड र बेन कुपरले नेदरल्यान्ड्सका लागि सबैभन्दा ठूलो साझेदारी गरेका थिए । ओ‘डाड र कुपरले २०२१ मा मलेसियाविरुद्ध १२५ रनको अविजित साझेदारी गरेका थिए ।

एन्गलब्रेटले डच टिमको खातामा ७५ रन थपे । तेजा निदामनुरुले तीन बलमा १८ रन बनाए ।

नामिबियाका रुबेन ट्रम्पेलमेनले दुई विकेट लिए । बेन सिकोन्गो र जान फ्राइलिन्कले समान एक विकेट लिए ।

शृंखलामा नेदरल्यान्ड्सको यो लगातार दोस्रो जित हो । नेदरल्यान्ड्सले यसअघि नेपाललाई दुई रनले हराएको थियो । नामिबियाको भने यो पहिलो हार हो । नामिबियाले पनि पहिलो खेलमा नेपाललाई २० रनले हराएको थियो ।