काठमाडौं । “हामीभन्दा अगाडिका दिदीहरूले पनि राम्रो गर्दै जानुभएको छ । हामी पनि त्यस्तै गछौँ भन्ने छ । यू–१६ साफ महिला च्याम्पियनसिपको उपाधिका लागि चुनौती प्रस्तुत गर्छौँ र नेपाललाई उपाधि दिलाएर देखाउँछौँ,” नेपालमै हुने साफ यू–१६ महिला च्याम्पियनसिपको पूर्वसन्ध्यामा आयोजित पत्रकार सम्मेलनमा घरेलु टिमकी कप्तान भूमिका बुढाथोकीले भनिन् ।

नेपाली युवा टिमको कप्तानी सम्हालेपछि बुढाथोकी पहिलोपटक पत्रकारअघि बोल्दै थिइन् । पहिलोपटक पत्रकारबाट आएको प्रश्नको सामना गरेकी बुढाथोकीको लवज र अनुहारमा यसको डर प्रस्टै देखिन्थो । डरका बाबजुद पनि शुक्रबारदेखि सुरु हुने वाफ महिला च्याम्पियनसिपमा सिनियर टिमले जस्तै आफ्नो टिमले पनि उत्कृष्ट प्रदर्शन गर्ने दाबी राखिन् ।  

दक्षिण एसियाली फुटबल महासंघ (साफ)को क्यालेन्डरअनुसार आयोजना हुन लागेको यस प्रतियोगितामा नेपालसँगै भारत, बंगलादेश र भुटान गरी चार टिमले सहभागिता जनाएका छन् ।

यही बेला नेपाली राष्ट्रिय महिला फुटबल टिम साउदी अरेबियामा जारी वाफ महिला च्याम्पियनसिपको फाइनलमा पुगेको छ । सिनियर टिमको प्रदर्शनबाट प्रभावित बनेका युवा नेपाली टिमले पनि उपाधि हासिल गर्ने लक्ष्य राखेको छ । 

वाफमा नेपाली टिमको प्रदर्शनबाट उत्साहित कप्तानको भावना बुझेपछि पत्रकारबाट प्रश्न आयो, ‘सिनियर टिममा कसको प्रदर्शन राम्रो लाग्छ ? कुनै दिन उहाँहरूजस्तै बन्ने इच्छा छ ?’

“प्रीति दिदी (प्रीति राई), साम्बा (सावित्रा भण्डारी) र टिमका सबै दिदीहरू राम्रो लाग्छ । उहाँहरूले राम्रो गरिरहनु भएको छ । कुनै दिन उहाँहरूजस्तै बन्ने इच्छा छ ।”

नेपालले यसअघि सन् २०२२ मा बंगलादेशमा भएको यू–१५ महिला साफ च्याम्पियनसिपको उपाधि जितेको थियो । त्यसबेला कप्तान भूमिका टिमको महत्त्वपूर्ण सदस्य थिइन् । भूमिकाको कप्तानीमा रहेको नेपाली टिमको मुख्य प्रशिक्षकमा चक्र तामाङ छन् । खेलाडी बटुलेर टिम बनाए पनि तामाङले प्रतियोगिता तयारीका लागि एक महिना पाए । तामाङ यू–१५ उपाधि विजेता र वाफमा सिनियर टिमले गरेको प्रदर्शनका कारण आफ्नो टिम उत्साहित रहेको बताउँछन् ।

“हामीले प्रतियोगिताका लागि एक महिनादेखि तयारी गरिरहेका छौँ । युवा टिमले एक महिनाको तयारी समय पाउनु राम्रो हो । मेरो नजरमा टिमको तयारी राम्रो भइरहेको छ । घरेलु मैदान पनि र गत वर्ष यू–१५ उपाधि पनि हामीले नै जितेकाले प्रेरित छौँ । यही बेला सिनियर टिमको प्रदर्शनले पनि टिममा पोजेटिम भाइभ्स आएको छ ।”

अन्य टिमका दाबी
दक्षिण एसियाका सातमध्ये प्रतियोगितामा पाकिस्तान, श्रीलंका र माल्दिभ्सको सहभागिता छैन । सहभागी चार टिमले सिंगल राउन्ड रोविन पद्धतिमा प्रतिस्पर्धा गर्नेछन् । जसको शीर्ष दुई टिम उपाधिका लागि भिड्नेछन् ।

प्रतियोगिताअघि भारतका प्रशिक्षक बीबी थोमस भारतले साफका लागि मात्र नभई फुटबल विकासको लागि तयारी गरिरहेको बताउँछन् ।

“दक्षिण एसियाली स्तरमा भारत सधैँ फुटबलमा विकास गरिरहेको देश हो । हामी सधैँ हाम्रो भविष्यमा केन्द्रित हुन्छौँ । हामीले साफका लागि मात्र नभई फुटबल विकासलाई पनि तयारी गरिरहेका छौँ,” थोमसले भने ।

भुटानी टिम खान्डु त्सोमोको प्रशिक्षणमा छ । उनले आफ्नो टिमको मानसिकता राम्रो रहेको बताउँछिन् ।

“हामीले मुस्किलले एक महिना प्रशिक्षणका लागि समय पायौँ । हाम्रो टिमका सबै खेलाडीहरू नयाँ हुन् । टिमका खेलाडीहरू शारीरिक रूपमा कमजोर भए पनि मानसिकता राम्रो छ । मलाई लाग्छ उनीहरूले आफ्नो शतप्रतिशत दिनेछन्,” प्रशिक्षक तिहोमोले भनिन् ।

पछिल्लो समय दक्षिण एसियाली महिला फुटबलको उमेर समूहमा सबैभन्दा उल्लेखनीय प्रगति गरिरहेको देश हो बंगलादेश । प्रतियोगितामा बंगलादेशी टिम साइफुल बरी तितुको प्रशिक्षणमा छ । प्रशिक्षक तितुले बंगलादेशको तयारी सधैँ शीर्ष स्थानमा रहने भएको बताए ।

“म यू–१९ टिमको प्रशिक्षक पनि भएकाले यो टिमसँग प्रशिक्षणका लागि धेरै समय पाइन । तयारी अन्य प्रतियोगिताका लागि जस्तै राम्रो भएको छ,” प्रशिक्षक तितुले भने, “यस प्रतियोगितामा चार टिम छन् । मलाई लाग्छ दक्षिण एसियाली स्तरमा सबै टिम विजेता बन्न चाहन्छन् । बंगलादेशको तयारी सधैँ शीर्ष स्थानमा रहनका लागि हुन्छ ।”

प्रतियोगिताको तालिका 
नेपालको पहिलो खेलमा शुक्रबार भुटान र भारतले प्रतिस्पर्धा गर्नेछन् । मार्च २ मा नेपालले बंगलादेशविरुद्ध खेल्दै प्रतियोगिताको सुरुआत गर्नेछ । मार्च ४ मा नेपालले भुटानसँग खेल्नेछ । मार्च ५ मा भारत र बंगलादेश भिड्दा मार्च ७ मा नेपालले भारतसँग खेल्नेछ । यस्तै, लिग चरणको अन्तिम खेलमा बंगलादेश र भुटान मार्च ८ मा भिड्नेछन् । 

लिग चरणका शीर्ष दुई टिम मार्च १० मा उपाधिका लागि भिड्नेछन् । प्रतियोगिताको सबै खेलहरू सातदोबाटोस्थित एन्फा मुख्यालयमा हुनेछ ।