काठमाडौं । घरेलु मैदानमा जारी त्रिदेशीय शृंखलामा नेदरल्यान्ड्सले नेपालविरुद्ध दुई रनको रोमाञ्चक जित निकालेको छ ।
बुधबार कीर्तिपुरस्थित त्रिवि क्रिकेट मैदानमा सम्पन्न खेलमा नेदरल्यान्ड्सले प्रस्तुत गरेको १८५ रनको लक्ष्य पछ्याउने क्रममा नेपालले निर्धारित २० ओभरमा आठ विकेट गुमाएर १८२ रनमात्र बनाउन सक्यो ।
मंगलबारदेखि सुरु भएको शृंखलामा नेपालको यो लगातार दोस्रो हार हो ।
१७ ओभर समाप्त हुँदा नेपाल १३७–६ को अवस्थामा थियो । जितका लागि अन्तिम तीन ओभरमा ४८ रन आवश्यक हुँदा १८औँ ओभरमा नेपालले १८ रन जोड्दै खेलमा फर्किने प्रयास गरेको थियो । १९औँ ओभरमा पुनः १५ रन बनाएपछि नेपालले खेल आफ्नो पक्षमा ढल्काएको थियो । अन्तिम ओभरमा नेपाललाई जितका लागि १५ रन आवश्यक हुँदा नेदरल्यान्ड्सका कप्तान स्कट एडवार्ड्सले रोइलोफ भान डर मेर्वेलाई बलिङको जिम्मेवारी सुम्पिएका थिए ।
मेर्वेले गरेको २०औँ ओभरको पहिलो बललाई दीपेन्द्रले चार रनका लागि बाउन्ड्री कटाएका थिए । दोस्रो बल छक्का प्रहार गरेपछि नेपाललाई जितका लागि अन्तिम चार बलमा पाँच रन आवश्यक थियो । तेस्रो बलमा दुई रन लिन खोज्दा करण रनआउट भएपछि नेपाललाई जितका लागि अन्तिम तीन बलमा तीन रन आवश्यक थियो । तर, चौथो बलमा दीपेन्द्रलाई बोल्ड गर्दै मेर्वेले नेपाललाई पुनः दबाबमा राखे । दीपेन्द्र आउट भएपछि क्रिजमा आएका प्रतिश जिसीले पहिलो बल डट खेल्दा नेपाललाई अन्तिम बलमा जितका लागि तीन रन आवश्यक थियो । तर, अन्तिम बलमा प्रतिशले एक रनमात्र जोडेपछि नेपालविरुद्ध नेदरल्यान्ड्सले दुई रनको रोमाञ्चक जित निकालेको हो ।
नेपालका दीपेन्द्रसिंह ऐरीले ६३ रन बनाए पनि टिमको हार टार्न सकेनन् । १९.३ ओभरमा आउट हुनुअघि दीपेन्द्रले ३४ बलमा ६ चौका र तीन छक्का प्रहार गरे । ट्वान्टी–२० अन्तर्राष्ट्रिय क्रिकेटमा दीपेन्द्रको यो आठौँ अर्धशतक हो । १२६–६ को अवस्थाबाट दीपेन्द्रले करण केसीसँग सातौँ विकेटका लागि ५५ रनको साझेदारी गर्दै नेपाललाई जित नजिक पुर्याए पनि सफल बन्न सकेनन् ।
१९.२ ओभरमा रनआउट हुनुअघि करणले सात बलमा एक छक्कासहित ११ रन थपे ।
नेपालका कप्तान रोहितकुमार पौडेलले ५० रनको अर्धशतकीय इनिङ खेले । ट्वान्टी–२० अन्तर्राष्ट्रिय क्रिकेटमा छैटौँ अर्धशतक बनाएका रोहितले ३६ बलमा ६ चौका र दुई छक्का प्रहार गरे । ०–१ को स्थितीबाट रोहितले ओपनर आसिफ सेखसँग ४५ बलमा ६५ रनको साझेदारी गर्दै नेपालको इनिङ सम्हालेका थिए । ८.१ ओभरमा आउट हुनुअघि आसिफले २३ बलमा चार चौका र एक छक्कासहित ३४ रन थपे ।
नेपालले आज पनि ओपनिङ साझेदारी बनाउन सकेन । ओपनर कुशल भुर्तेल दोस्रो इनिङको चौथो बलमा ‘डक’ हुँदा नेपालले रनको खाता नै खोलेको थिएन । यस्तै, सोमपाल कामी पनि ‘गोल्डेन डक’ भए । कुशल मल्लले ११ रन जोड्दा सन्दीप जोरा पनि आठ रनमा पभेलियन फर्किए ।
नेदरल्यान्ड्सका मेर्वे र साइब्रान्ड एन्गलब्रेटले समान दुई विकेट लिए । आर्यन दत्त, टिम भान डेर गुटेन र भिभियन किग्माले एक–एक विकेट लिए ।
त्यसअघि ‘डेब्युट्यान्ट’ माइकल लेभिटले अर्धशतक बनाएपछि टस हारेपछि ब्याटिङमा निम्त्याइएको डच टिमले निर्धारित २० ओभरमा चार विकेट गुमाएर १८४ रनको योगफल खडा गरेको थियो ।
नेदरल्यान्ड्सबाट पहिलो ट्वान्टी–२० अन्तर्राष्ट्रिय क्रिकेट खेलेका लेभिटले ५४ रन बनाए । १५–१ को अवस्थाबाट लेभिटले साइब्रान्ड एन्गलब्रेटसँग ६२ रनको साझेदारी गर्दै नेदरल्यान्ड्सको इनिङ सम्हालेका थिए । नेपालका कुशल मल्लले गरेको ८.५ ओभरमा आसिफ सेखबाट स्टम्प हुनुअघि लेभिटले ३६ बलमा पाँच चौका र तीन छक्का प्रहार गरे ।
साइब्रान्ड एन्गलब्रेट ४९ रनमा अविजित रन बनाए । ७७–२ बाट एन्गलब्रेटले कप्तान स्कटल एडवार्ड्ससँग तेस्रो विकेटका लागि ४६ रनको साझेदारी गर्दै नेदरल्यान्ड्सको इनिङ अघि बढाएका थिए । कप्तान एड्वार्ड्सले १६ बलमा पाँच चौकासहित ३३ रन बनाए ।
एन्गलब्रेटले १२३–३ को अवस्थाबाट चौथो विकेटका लागि तेजा निदामनुरुसँग ६१ रनको साझेदारी गरेपछि नेदरल्यान्ड्स १८४ रनको योगफसम्म पुगेको हो ।
पहिलो इनिङको अन्तिम बलमा रनआउट हुनुअघि निदामनुरुले २४ बलमा तीन चौकासहित ३१ रन थपे ।
नेदरल्यान्ड्सविरुद्ध पनि नेपाली टिमका बलर किफायती बन्न सकेनन् । नेपालका लागि करण केसी र कुशल मल्लले समान एक विकेट लिए । तीन ओभर बलिङ गरेका करणले २९ रन खर्चिए । चार ओभर बलिङ गरेका कुशलले ३७ रन खर्चिए ।
मंगलबारदेखि सुरु भएको शृंखलामा नेपालको यो दोस्रो खेल हो । नेपाल यसअघि पहिलो खेलमा नामिबियासँग २० रनले पराजित भएको थियो । नेदरल्यान्ड्सको भने यो शृंखलाको पहिलो खेल हो ।
नेपालले अब फागुन १८ गते नामिबिया र १९ गते नेदरल्यान्ड्ससँग खेल्नेछ । शृंखलाको लिग चरणबाट शीर्ष दुई टोली उपाधिका लागि फाइनलमा भिड्नेछन् । फाइनल खेल फागुन २२ गते हुनेछ ।