काठमाडौं । अख्तियार दुरुपयोग आयोग अनुसन्धानका प्रमुख आयुक्त प्रेमकुमार राईले टेरामक्स प्रकरणमा बयान लिने काम सकिएको बताएका छन् । प्रतिनिधिसभाअन्तर्गतको सार्वजनिक लेखा समितिको मंगलबारको बैठकमा उनले यस्तो बताएका हुन् ।

टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम अर्थात् टेरामक्स प्रकरणमा संलग्नको बयान लिने काम सकिएको उनले जानकारी गराए । यो विषयमा अब छिटै टुंगोमा पुगिने उनको भनाइ छ ।

उनले सुरक्षण मुद्रण केन्द्रअन्तर्गत सेक्युरिटी प्रेस खरिद योजनाको टेप प्रकरणको पनि अनुसन्धान भइरहेको बताए ।

नेपाल दूरसञ्चार प्राधिकरणले टेरामक्स खरिद एवं जडान गर्ने योजना अघि सारेको थियो । सुरुदेखि नै विवादित यो योजनामा चरम भ्रष्टाचार भएको भन्दै संसदीय समितिको सिफारिसमा अख्तियारले अनुसन्धान थालेको थियो ।