![चौतर्फी सुरक्षा घेराबीच कसरी संसद् भवन छिरे लघुवित्तपीडित ?](https://12khari.top/uploads/posts/samsad3-1708939339.jpg)
काठमाडौं । काठमाडौंको नयाँ बानेश्वरस्थित संसद् भवनभित्र सोमबार लघुवित्तपीडित छिरेका छन् । संसद् भवनको चारैतिर तैनाथ गरिएको सुरक्षा घेरा तोडेर पीडितहरू भित्र नै छिरेका हुन् ।
भित्र छिरेकाहरूमध्ये ४८ जना महिला र एकजना पुरुषलाई प्रहरीले नियन्त्रणमा लिएको छ । प्रहरीका अनुसार गेटमा भित्रबाट बोलाएको भन्दै सुरक्षाकर्मीलाई झुक्काएर उनीहरू भित्र छिरेको देखिएको छ ।
गेटभित्र छिरेपछि भने नाराजुलुस गर्न थालेपछि उनीहरूलाई नियन्त्रणमा लिइएको छ । भवनभित्र छिरेकालाई नियन्त्रण गर्न प्रहरीलाई हम्मेहम्मे नै परेको थियो । उनीहरूलाई नियन्त्रणमा लिन संसद् सचिवालयका मर्यादापालक समेत निस्किनु परेको थियो ।
उपत्यका प्रहरी कार्यालय रानीपाखेरीका प्रमुख एआईजी दिपक थापाका अनुसार उनीहरू दुई/तीनजना जम्मा भएर गेटबाट भित्र छिरेको खुलेको छ ।
“आज बानेश्वर क्षेत्रमा उनीहरूको कुनै प्रदर्शन थिएन । तर, एकाएक भित्रबाट बोलाएको छ भनेर दुई/तीनजना जम्मा भएर गएको देखियो । हामी थप अनुसन्धान गर्दैछौँ,” एआईजी थापाले भने ।
संसद् भवनभित्र प्रदर्शनकारी छिर्नुलाई गम्भीर सुरक्षा कमजोरी मानिएको छ । नियन्त्रणमा लिएकाहरूलाई प्रहरी वृत्त बानेश्वरमा राखिएको छ ।