काठमाडौं । नेपाल बैंकर्स संघका अध्यक्ष एवं एनएमबि बैंकका प्रमुख कार्यकारी अधिकृत (सीईओ) सुनील केसीले बैंकहरू सबल अवस्थामा रहेको बताएका छन् ।

शनिबार बनेपामा नेपाल आर्थिक पत्रकार संघ (नाफिज)ले आयोजना गरेको एड्भान्स बैंकिङ तालिम कार्यक्रममा उनले बैंकहरूसँग पर्याप्त तरल सम्पत्ति र निष्क्रिय कर्जा केही बढेको भए पनि व्यवस्थापन गर्नै नसकिने अवस्था नभएको बताएका हुन् ।

अहिलेको अवस्थामा कुनै पनि बैंक डुब्ने अवस्था नदेखिएको उनले उल्लेख गरे । “बैंकहरूले सरकारी ऋणपत्र र बन्डहरूमा साढे १२ खर्बभन्दा बढी लगानी गरेका छन् । यसबाहेक सीआरआर र एसएलआर गरेर १७÷१८ खर्ब तरल सम्पत्ति छ,” उनले भने, “पछिल्लो समय बैंकहरू डुब्न लागेको केही व्यक्तिको अभिव्यक्तिले सर्वसाधारण निक्षेपकर्ता आत्तिएका छन् । तर, बैंकहरूसँग औसतमा निक्षेपको २८ प्रतिशतभन्दा धेरै खुद तरल सम्पत्ति रहेकाले कुनै पनि बैंकमा समस्या छैन ।”

उनले बैंकहरू सबल र सुरक्षित रहेको पनि बताए । पाँच लाख रुपैयाँसम्मको निक्षेपको बिमा पनि हुने भएको भन्दै उनले पर्याप्त तरलता रहेकाले निक्षेपकर्ता डराउनुपर्ने अवस्था नरहेको जिकिर गरे ।

नेपालको सन्दर्भमा तरलताका हिसाबले बैंकहरू सबल अवस्थामा रहेको केसीले बताए ।