काठमाडौं । पश्चिम एसियन फुटबल फेडेरेसन महिला च्याम्पियनसिप (वाफ)को समूह चरणमा शतप्रतिशत नतिजासहित नेपाल सेमिफाइनलमा प्रवेश गरेको छ । 

शनिबार राति साउदी अरेबियाको किंग अब्दुल्लाह स्पोर्ट्स सिटी रंगशालामा सम्पन्न समूह ‘बी’ को खेलमा नेपालले प्यालेस्टाइनलाई ४–० ले हराएको हो । नेपालको जितमा सावित्रा भण्डारीले दुई गोल गरिन् । यस्तै, रेखा पौडेल र गीता रानाले गोल गरिन् । 

खेलको ४०औँ मिनेटमा सावित्राले गोल गरेपछि पहिलो हाफमा नेपालले १–० को अग्रता बनाएको थियो । ५९औँ मिनेटमा रेखाको गोलमा नेपालले अग्रता दोब्बर बनायो । ७८औँ मिनेटमा सावित्राले नै गोल गरेपछि नेपालले अग्रतालाई ३–० मा पुर्‍याएको थियो ।

यस्तै, इन्जुरी समयमा गीताले पेनाल्टीमा गोल गरेपछि नेपालले ४–० को जित सुनिश्चित गरेको हो ।

जितसँगै सेमिफाइनल प्रवेश गरेको नेपालले अब फाइनल प्रवेशका लागि लेबनानसँग खेल्ने छ । नेपाल समूह ‘बी’ को विजेता र लेबनान समूह ‘ए’ को उपविजेता बन्दै सेमिफाइनल प्रवेश गरेका हुन् । यी दुई टिमबीचको खेल २७ फेब्रुअरीमा हुनेछ ।