काठमाडौं । नमुना बागेश्वरी बहुमुखी क्याम्पसको आयोजनामा सम्पन्न धादिङ जिल्लाव्यापी बुद्धिचाल (चेस) प्रतियोगिताको उपाधि धुनिबेसीको खानीखोलाका मनिष कोइरालाले जितेका छन् ।

मछिन्द्र बहुमुखी क्याम्पसका मनिषले शनिबार भएको पाँच चरणको खेलमा पाँच जित निकाल्दै च्याम्पियन बनेका हुन् । शतप्रतिशत जित निकाल्ने क्रममा उनले संदिल श्रेष्ठ, राजेन्द्र रिमाल, शंकल्प पौडेल, सुदिन नेपाल र आशिष लामिछानेलाई हराए । उपाधिसँगै मनिषले सात हजार रुपैयाँ पुरस्कार जितेका छन् ।

नमुना बहुमुखी क्याम्पस सञ्चालक समितिका अध्यक्ष एवं प्रतियोगिताका संयोजक रेशमराज खतिवडाको सक्रियतामा सञ्चालन भएको खेलमा गल्छीका स्थानीय व्यवसायी विष्णु मिश्र चार अंकसहित दोश्रो स्थानमा भए । उनले पाँच हजार रुपैयाँ पुरस्कार प्राप्त गरे । वैरेनीका रोशन दुवाडीले डाइरेक्ट इन्काउन्टरका आधारमा चार अंक हासिल गर्दै तेश्रो स्थानमा रहन सफल भए । उनले नगद तीन हजार रुपैयाँ प्राप्त गरे ।

शनिबार भएको समापन समारोहमा गल्छी गाउँपालिकाका अध्यक्ष केदारनाथ खतिवडाले विजयी खेलाडीहरूलाई पुरस्कार वितरण गरे । शिक्षा तथा खेलकुद शाखा प्रमुख पेमा डोर्जे थोकरले मेडल र नेपाल बुद्धिचाल संघका अध्यक्ष हिराकाजी महर्जनले विजयी खेलाडी कोइरालालाई ट्रफी प्रदान गरे ।