काठमाडौं । वेस्ट एसियन फुटबल फेडेरेसन महिला च्याम्पियनसिप (वाफ) को आफ्नो पहिलो खेलमा नेपालले सिरियाविरुद्ध पहिलो हाफमा ३–१ को अग्रता बनाएको छ ।

साउदी अरेबियाको किङ अब्दुल्लाह स्पोर्ट्स सिटीमा जारी खेलको पहिलो हाफमा नेपालका अमिषा कार्की, अनिता बस्नेत र सावित्रा भण्डारीले समान एक गोल गरे ।

खेलको १०औँ मिनेटमा अमिषा कार्कीले गोल गर्दै नेपाललाई अग्रतामा राखेकी थिइन् ।

१२औँ मिनेटमा नेपालकी अनिता बस्नेतले अग्रता दोब्बर बनाइन् । नेपालले पाएको कर्नरमा अनिताले सोझै गोल गरेकी थिइन् ।

१९औँ मिनेटमा सावित्रा भण्डारीले नेपालको अग्रतालाई ३–० मा पुर्‍याइन् । मिडफिल्डबाट प्रिती राईले निकालेको लामो बल अमिषा कार्कीले नियन्त्रणमा राख्दै अघि बढाएकी थिइन् । अमिषाको पहिलो प्रहार सिरियाका गोलकिपरले बचाएकी थिइन् । सोही रिबाउन्डमा अमिषा बक्सभित्र नै रहेकी सावित्रालाई निकालेको बलमा उनले कुनै गल्ति नगरी नेपालको अग्रता अझ फराकिलो बनाइन् ।

४३औँ मिनेटमा सिरियाकी कप्तान एल्हाम कोर्ड ओघियाले गोल गर्दै आफ्नो टिमलाई ३–१ को अवस्थामा ल्याइन् ।