काठमाडौं । नेपाली कांग्रेस ललितपुर जिल्ला सभापति जितेन्द्रकुमार श्रेष्ठले पार्टीले एकताको सन्देश दिन नसक्दा जनताले औँला ठडाउने मौका पाएको बताएका छन् । सोमबार ललितपुरको गोदावरीमा महासमिति बैठकको उद्घाटनसत्रमा उनले कांग्रेसले एकताको सन्देश दिन ढिला गर्न नहुनेमा जोड दिए ।

“आज नीति अधिवेशनको रूपमा हामी महासमिति बैठकमा उपस्थित छौँ । यसपालिको नीति अधिवशेनले कांग्रेस एकताको रूपमा अघि बढेको छ भन्ने सन्देश दिनुपर्छ,” उनले भने, “अहिले हामीलाई जनताले हात ठडाएको अवस्था छ । विभिन्न माध्यमबाट गाली गर्ने, हामीबीचमा भएको कुरामा प्रश्न जनताले उठाएका छन् । यो यसलाई निमिट्यान्न पार्नुपर्छ ।”

श्रेष्ठले अरू दलले मिसन ८४ भनेर बजारमा हल्ला गरिरहँदा कांग्रेसले एकताको सन्देश दिन सके आउँदो निर्वाचनमा पनि पहिलो दल बन्ने बताए । “अन्य दलले ८४ ८४ भन्ने हल्ला बजारमा चलाएका छन् । हामी एक भए ८४ मा त्यसरी पहिलो पार्टी हुन्छौँ । तर, यो मञ्चबाट एकताको सन्देश दिनुपर्ने अवस्था छ,” उनले थपे ।

स्वागत मन्तव्यका क्रममा उनले ललितपुर जिल्लाले एकताको सन्देश दिँदा गएको स्थानीय तह निर्वाचनमा पार्टीले ५६ प्रतिशत मत ल्याएको उल्लेख गरे । पार्टीले ८४ को निर्वाचनमा ७५ प्रतिशतमाथि मत ल्याउने उनको भनाइ छ ।