काठमाडौं । नेपाली कांग्रेस दोलखा, खोटाङ र सोलुखुम्बुका जिल्ला सभापतिहरूले निर्वाचित भई आएका महासमिति सदस्यहरूलाई बाहिर राखी महासमिति बैठक आयोजना गरिए बहिष्कार गर्ने चेतावनी दिएका छन् । आइतबार विज्ञप्ति जारी गरी उनीहरूले यस्तो चेतावनी दिएका हुन् । 

कांग्रेस महासमिति बैठक सोमबार (भोलि)देखि ललितपुरको गोदावरीमा सुरु हुँदै छ । तीन जिल्लाका सभापतिहरूले विधिपूर्वक निर्वाचन/ सर्वसम्मत/निर्विरोध गराई केन्द्रीय निर्वाचन समितिसमक्ष पेस गरिएका महासमिति सदस्यहरूलाई बैठकबाट बाहिर राख्ने प्रपञ्च भएको सुनिन आएको उल्लेख गरेका छन् ।

“सिंगै जिल्लालाई महासमिति सदस्यविहीन गर्ने षड्यन्त्रलाई पराजित गरी उक्त महासमिति बैठकबाट पारित हुने प्रस्तावहरूको अपनत्व ग्रहण गर्ने व्यवस्था गरियोस् । अन्यथा, निर्वाचित भई आएका महासमिति सदस्यहरूलाई बाहिर राखी हुने महासमिति बैठकमा हामी जिल्ला सभापतिहरू भाग नलिने जानकारी गराउँद छौँ,” विज्ञप्तिमा लेखिएको छ ।