काठमाडौं । भारतको हरियाणा, पञ्जाब र उत्तर प्रदेशका किसानहरूले विभिन्न माग राख्दै ‘दिल्ली चलो’ आन्दोलन गरिरहेका छन् ।

यसक्रममा दिल्लीतर्फ जान खोजिरहेका किसानहरू र प्रहरीबीच पञ्जाब र हरियाणाबीचको शम्भु सीमा विन्दुमा तनाव बढेको छ ।

किसानहरूलाई रोक्न प्रहरीले अश्रु ग्यास प्रहार गरेको र धेरैलाई हिरासतमा लिइएको बताइएको छ । अश्रु ग्यासका गोला प्रहार भइरहेको र किसान एवं मिडियाकर्मीहरूको भागदौड चलिरहेको भिडियो देखिएको एनडीटीभीले जनाएको छ ।

शम्भु सीमामा ठूलो संख्यामा प्रहरी र सुरक्षाकर्मी रहेको र किसानहरूलाई तितरबितर पार्न ड्रोनबाट समेत ‘स्मोक बम्ब’ फालेको बताइएको छ ।

किसानहरू अनुहारमा स्कार्फ बेरेर धातु र कंक्रीटको बार पार गर्दै अघि बढ्न खोजिरहेको थिए । सोहीक्रममा प्रहरीले अश्रु ग्यास प्रहार गरिरहेको युद्धमैदान जस्तो दृश्य देखिएको बताइएको छ ।

२२० किसान संगठन र करिब एक लाख किसानहरू मंगलबार बिहानैदेखि संघीय राजधानी दिल्लीतर्फ जान खोजेका थिए ।

यो प्रदर्शनले सन् २०२०/०२१ को किसान आन्दोलन दोहोरिनसक्ने चिन्ता बढाएको छ । त्यतिबेला दर्जनौँको ज्यान गएको थियो भने दिल्लीमा नाकाबन्दी समेत गरिएको थियो ।

अहिले पनि प्रहरीले दिल्ली छिर्ने प्रमुख नाकामा कडाइ गरिएको बताइएको छ ।

बालीका लागि न्यूनतम समर्थन मूल्य (एमएसपी) निश्चित गर्ने कानुनको कार्यान्वयन हुनुपर्ने किसानको माग छ । बजारको अनिश्चितताका कारण किसानहरूका लागि यो सबैभन्दा महत्त्वपूर्ण माग रहेको छ ।