काठमाडौं । गायिका एलिना चौहानले आफ्नो नाम बदनाम नगर्न आग्रह गरेकी छन् । आफू ‘कट्टा हान्दिन्छु’ गीतको गायक मात्र भएको भन्दै उनले बदनाम नगर्न आग्रह गरेकी हुन् ।
‘कट्टा हान्दिन्छु’ बोलको गीतलाई चोरीको आरोप लगाइएको छ । त्यसबारे उनले आफू गायक मात्र भएको स्पष्ट पारिन् । उनले बाह्रखरीसँग भनिन्, “स्थापित गीतकार (नेत्र अर्याल)ले लेखेको गीत हो । उहाँलाई गीतका केही शब्द चोरी गरिरहनु पर्दैन भन्ने लाग्छ ।”
शब्द र बिट नै नमिल्ने गीत कसरी चोरी हुन्छ ? उनको प्रश्न छ ।
“हाम्रो गीत हिट भएपछि पपुलारिटीका लागि उहाँहरूले आरोप लगाइरहनुभएको छ । मैले स्टेज प्रोग्राममा गाएर हिट बनाएको गीत हो,” उनी भन्छिन्, “हामीले कपी गरेको भए कसरी हिट हुन्थ्यो ? पहिला आएको गीत हो भने उनीहरूकै गीत हिट हुन्थ्यो होला ।”
‘कट्टा हान्दिन्छु’ विरुद्ध उजुरी समेत दिइएको छ । आफ्नो गीतबाट चोरी गरिएको दाबी गर्दै गायक विश्वराम कार्कीले नेपाल प्रतिलिपि अधिकार रजिस्ट्रारको कार्यालयमा उजुरी दर्ता गराएका हुन् ।
“चोरी भएको भए पनि त्यसको समाधान खोज्ने ठाउँ होला । प्रस्तोता समाज होला । त्यस्तै अर्को कुनै ठाउँ होला,” एलिना भन्छिन्, “मिडियाबाजी गरेर समस्या नै भए पनि समाधान हुँदैन । मेरो नाम दुरुपयोग गरेर हुँदैन । मलाई बदनाम गर्ने प्रयास भइरहेको छ । बिनागल्ती मैले गाली खाइरहेको छु, यो न्यायोचित होइन ।” प्रमाण भए पेस गर्न उनको चुनौती छ ।
‘कट्टा हान्दिन्छु’ मा एलिना र खेम सेन्चुरीको स्वर छ । नेत्र अर्यालको शब्द र खेम सेन्चुरीको संगीत छ । दुई हप्ताअघि युट्युबमा रिलिज गरिएको गीत अहिले पनि एक नम्बर ट्रेन्डिङमा छ ।
