काठमाडौं । आर्टिफिसियल इन्टेलिजेन्स (एआई)का क्षेत्रमा काम गर्दै आएको कम्पनी फ्युजमेसिनले नेपालमा फेलोसिप सार्वजनिक गरेको छ ।
नेपालका समिर मास्केले स्थापना गरेको कम्पनी अमेरिकी सेयर बजार नास्ड्याकमा सूचीकृत हुँदैछ । अमेरिका आधारित फ्युजमेसिनको कम्पनी नेपालमा पनि छ । फ्युजमेसिन नेपालले ‘फ्युजमेसिन एआई फेलोसिप २०२४’ को रजिस्ट्रेसन खुला गरिएको बताएको हो ।
यो फेलोसिप कार्यक्रम प्रमुख अमेरिकी विश्वविद्यालयका संकाय र एआई उद्योगका विज्ञले निर्माण गरेको कम्पनीले जनाएको छ ।
फेलोसिपले एआई र डेटाका क्षेत्रमा उच्च स्तरीय जनशक्ति विकास गर्ने र फ्युजमेसिन्स स्वामित्वको माइक्रोडिग्री प्रदान गर्ने कम्पनीको भनाइ छ । फ्युजमेसिन्सका सीईओ र संस्थापक समीर मास्केले प्रत्येक वर्ष फेलोसिप प्रदान गर्दै आएको बताएका छन् ।
उनले यस वर्षको विशेष कार्यक्रमले विश्वमञ्चमै एआईका क्षेत्रमा उत्कृष्ट नेपाली प्रतिभा उत्पादन हुने विश्वास व्यक्त गरेका छन् । सन् २०१७ यता फ्युजमेसिनले विभिन्न १२ देशमा ८०० फेलोसिप प्रदान गरेको बताएको छ । फ्युजमेसिनको दक्षिण एसियाका प्रबन्ध निर्देशकले एआईमा दक्ष जनशक्तिको आवश्यकता बढ्दै गएको बताएका छन् ।
यस्तोमा फ्युजमेसिनले यो फेलोसिपमार्फत ६ महिने एआई तालिम प्रदान गर्ने भएको हो । अधिकांश अनलाइनबाट उपलब्ध हुने तालिममा साप्ताहिक लाइभ लेक्चर र थप सिकाइका समावेश छ ।
फेलोसिपमा सहभागी हुनेहरूलाई एल्गोरिदम, लाइब्रेरी, फ्रेमवर्क र अत्याधुनिक कम्प्युटर भिजन, नेचुरल भाषा प्रशोधन एवं जेनेरेटिभ एआई प्रविधिको प्रयोग र कार्यान्वयन सिकाइने कम्पनीको भनाइ छ ।
यो फेलोसिप लिनेहरू एआईका क्षेत्रमा रोजगारी पाउन सक्षम हुने कम्पनीको विश्वास छ । फेलोसिपमा आवेदन दिनेहरू विभिन्न चरण पार गरेर छानिने र छात्रवृति प्राप्त गर्ने कम्पनीले जनाएको छ ।
फेलोसिपका लागि मार्च १० सम्म आवेदन दिन सकिने र अप्रिल ८ देखि कक्षा सुरु हुने फ्युजमेसिनले जनाएको छ ।
आवेदन दिन एवं थप जानकारी प्राप्त गर्नका लागि
https://fuse.ai/ai-fellowship/nepal/