काठमाडौं । राष्ट्रिय प्रजातन्त्र पार्टी (राप्रपा) संसदीय दलका उपनेता बुद्धिमान तामाङले तेस्रोलिंगीका कारण चाबेलको गोपीकृष्ण हलनजिक क्षेत्रमा मानिसले दुःख पाएको गुनासो गरेका छन् ।
प्रतिनिधिसभाअन्तर्गतको राज्यव्यवस्था तथा सुशासन समितिको आइतबारको बैठकमा उनले साँझको समयमा उक्त क्षेत्रमा तेस्रोलिंगीले मानिसलाई दुःख दिने गरेको बताए । “तेस्रोलिंगी पनि चाबेल, गोपीकृष्ण एरियामा धेरै नै भएको छ । मानिसहरूले अनाहकमा दुःख पाउने अवस्था छ,” उनले भने ।
सांसद तामाङले एयरपोर्टमा घण्टौँ विमान कुर्नुपर्ने समस्या रहेको पनि बताए । यस्तो अवस्थामा पर्यटकले के सोच्छन् होला भन्दै उनले प्रश्न गरे ।
“ऐन नै परिवर्तन गर्नुपर्छ भने गरौँ । नियम बनाउँदा हुन्छ भने गरौँ । इमिग्रेसनका कर्मचारीको कुरा आयो, हुन त मान्छे धेरै भएर होला, डेढ घण्टा कुर्नुपर्यो । त्यस्तै हुँदा टुरिस्टहरूले के सोच्छन् ?,” उनले भने ।
बैठकमा उपप्रधान एवं गृहमन्त्री नारायणकाजी श्रेष्ठको पनि उपस्थिति थियो ।
