काठमाडौं । जेलमा रहेका पाकिस्तानी विपक्षी नेता इमरान खानको पार्टीको समर्थनमा रहेका उमेदवारले सरकार गठन गर्ने योजना बनाएका छन् ।
पूर्वप्रधानमन्त्री खानका तत्कालीन निकट सहयोगीले अन्तिम चुनावी नतिजा सार्वजनिक नगरे शान्तिपूर्ण विरोध गर्न समर्थकलाई आग्रह गरेका छन् ।
बिहीबार भएको निर्वाचनमा पाकिस्तानका २४ करोड १० लाख नागरिकले मतदान गरेका थिए ।
आर्थिक संकटसँग संघर्ष गरिरहेको पाकिस्तानमा गम्भीर ध्रुवीकृत राजनीतिक वातावरणले चुनावी नतिजा समेत अस्तव्यत बनाएको छ ।
खान र उनका मुख्य प्रतिद्वन्द्वी तीन पटक पाकिस्तानका प्रधानमन्त्री बनेका नवाज सरिफ दुवैले शुक्रबार चुनावमा विजयको घोषणा गरेका थिए ।
![Global Ime bank](https://baahrakhari.com/uploads/bigyaapan/30885600.gif)
यससँगै त्यहाँ सरकार कसले गठन गर्छ भन्ने अनिश्चितता बढेको छ ।
खानको पाकिस्तान तहरीक इन्साफ (पीटीआई)का अध्यक्ष गोहर खानले सबै संस्थालाई आफ्नो पार्टीको जनादेशलाई सम्मान गर्न आह्वान गरेका छन् ।
यस्तै, सरिफले पनि शुक्रबार आफ्नो पार्टी बलियो भएर अगाडि आएको भन्दै गठबन्धन सरकार गठन गर्न अरुपार्टीसँग छलफल गर्ने भनेका थिए ।
पाकिस्तानको निर्वाचन आयोगका अनुसार कुल २६६ सिटमध्ये पछिल्लो चुनावी नतिजाले स्वतन्त्र उमेदवारले १०० सिट जितेका छन् ।
सरिफको पाकिस्तान मुस्लिम लिग नवाज (पीएमएल–एन)ले ७२ सिट जितेको छ ।
चुनाव चिह्न नपाएपछि खानको पार्टी पीटीआईका नेताहरू स्वतन्त्र उमेदवार भएर चुनाव लडेका थिए ।