काठमाडौं । अख्तियार दुरूपयोग अनुसन्धान आयोगले काभ्रेको बनेपा नगरपालिका–९ का वडाध्यक्ष नृपेश बादेविरुद्ध भ्रष्टाचार मुद्दा दायर गरेको छ । 

उनले सेवाग्राहीबाट १५ लाख रुपैयाँ घुस लिई भ्रष्टाचार गरेको ठहर गर्दै अख्तियारले शुक्रबार विशेष अदालत काठमाडौंमा मुद्दा दायर गरेको हो । 

बादेले घर बाटो सिफारिस गर्ने प्रयोजनको लागि सेवाग्राहीसँग घुस माग गरिरहेको भन्ने सूचना प्राप्त भएपछि अख्तियारले उनीमाथि निगरानी बढाएको थियो ।

सोहीक्रममा टंगलास्थित अख्तियारको कार्यालयबाट खटिएको टोलीले गत माघ ३ गते बादेलाई सेवाग्राहीबाट १५ लाख रुपैयाँ घुस लिइसकेको अवस्थामा नियन्त्रणमा लिएको थियो । 

विशेष अदालतमा दायर गरिएको मुद्दामा उनीसँग १५ लाख रुपैयाँ बिगो दाबी गरिएको अख्तियारद्वारा शुक्रबार जारी विज्ञप्तिमा  उल्लेख छ ।