काठमाडौं । आउँदो शुक्रबार दुई नेपाली सिनेमा रिलिज हुँदै छन् । ‘दयारानी’ र ‘हात्तीछाप’ फ्राइडे रिलिजअन्तर्गत प्रदर्शनमा आउन लागेका हुन् । 

यी दुवै चलचित्रको मुख्य भूमिकामा दयाहाङ राई छन् । उनी यतिबेला एकै साथ दुईवटै चलचित्रको पब्लिसिटी गर्दै आएका छन् । 

गत बिहीबार चलचित्र ‘दयारानी’ले आयोजना गरेको पत्रकार सम्मेलनमा दयाहाङले एकैदिन आफ्ना दुई सिनेमा रिलिज हुन लागेको भन्दै जुन राम्रो छ, त्यही हेरिदिन आग्रह गरे । 

“म त दुईवटै सिनेमा हेरिदिन आग्रह गर्छु । यदि, एउटै मात्रै हेर्ने हो भने जुन राम्रो लाग्छ त्यही हेरिदिनु होला,” उनले भनेका थिए । 

आफूले सकेसम्म एकैदिन आफ्ना सिनेमा रिलिज नगर्न निर्माता, निर्देशक तथा वितरकसँग आग्रह गर्ने गरेको तर त्यसभन्दा बढी हात आफ्नो नरहने बताए । यद्यपि, पछिल्लो समय सिनेमा हलको संख्या बढेकाले दुईवटा सिनेमा रिलिज हुँदा पनि खासै धेरै समस्या नहुने उनको भनाइ छ । 

एकैदिन सिनेमा रिलिज हुँदा दुईमध्ये एउटालाई केही न केही घाटा हुने भने दयाहाङ स्वीकार्छन् । गत वैशाख १ गते पनि उनका दुईवटा सिनेमा ‘जारी’ र ‘बिहे पास’ एकैदिन रिलिज भएका थिए । ‘जारी’ले ब्लकबस्टर कमाइ गर्दा ‘बिहे पास’ले भने राम्रो कमाई गर्न सकेको थिएन । ‘बिहे पास’ पछि पुनः रिलिज भएको थियो । तर, रि–रिलिजमा पनि यसले दर्शक तान्न सकेन ।  

दयाहाङले बिहीबारको सोही कार्यक्रममा सिनेमा तत्कालका लागि मात्रै नभएर पछिसम्मका लागि पनि हुने बताएका थिए । 

“एकैदिन सिनेमा रिलिज हुँदा व्यावसायिक नाफाघाटा पक्कै पनि होला । हल रिलिज व्यावसायिक नाफाघाटाका लागि होला । तर सिनेमा रिलिजका लागि मात्रै पनि होइन,” दयाहाङ भन्छन्, “हामी अहिले ५० वर्ष अगाडिका सिनेमाका कुरा गर्छौं । त्यसैले अहिलेका सिनेमा ४०/५० वर्ष पछिसम्मका लागि पनि हो भनेर बुझ्नुपर्छ ।” 

दयाहाङले अहिले डेढ दर्जन सिनेमा साइन गरेका छन् । त्यसबाहेक पाँचवटा सिनेमा घोषणा हुन बाँकी रहेको उनले बताए । त्यसैले उनले अब एक वर्ष नयाँ सिनेमा साइन नगर्ने घोषणा गरेका छन् ।