काठमाडौं । नेपाल खेलकुद पत्रकार मञ्चले हरेक वर्ष आयोजना गर्ने एनएसजेएफ पल्सर स्पोर्ट्स अवार्डको २०औँ संस्करणका निम्ति वर्ष महिला खेलाडीको मनोनयन सार्वजनिक गरेको छ । 

आइतबार मञ्चले वर्ष महिला खेलाडीको मनोनयनमा पर्न सफल उत्कृष्ट आठजनाको नाम सार्वजनिक गरेको हो । वर्ष २०७९ सालमा गरेको प्रदर्शनका आधारमा मनोनयन गरिएको मञ्चले जनाएको छ ।

वर्ष महिलामा फुटबलकी अमिशा कार्की, बास्केटबलकी अनुशा मल्ल, पौडीकी डुवाना लामा, एथ्लेटिक्सकी जयरानी थारु, जुडोकी पुनम श्रेष्ठ, एथ्लेटिक्सकी पुष्पा भण्डारी, एथ्लेटिक्सकी राजपुरा पछाई र ट्रायथलनकी श्रेवी महर्जन मनोनयनमा परेका छन् ।

• एनएसजेएफ–पल्सर स्पोर्ट्स अवार्ड : यी आठ वर्ष पुरुष खेलाडीको मनोनयनमा 

यसअघि, पिपल्स च्वाइस विधाको मनोनयन सार्वजनिक भइसकेको छ । पिपल्स च्वाइसमा फुटबलका अनन्त तामाङ, करातेका विप्लवलाल श्रेष्ठ, भलिबलकी निरुता ठगुन्ना, टेबलटेनिसकी सिक्का सुवाल श्रेष्ठ र शारीरिक सुगठनकी रजनी श्रेष्ठ मनोनयनमा परेका छन् ।

मञ्चले वर्षका उत्कृष्ट युवा तथा प्रशिक्षक विधाको मनोनयन पनि छिटै सार्वजनिक गरिने जनाएको छ ।

पारा एथलिट सम्मान, स्पेसल अवार्ड, लाइफटाइम अचिभमेन्ट अवार्ड र एसियन स्पोर्ट्स जर्नालिस्ट अवार्डको घोषणा माघ २८ गते कार्यक्रमकै दिन गरिनेछ ।

योपटक वर्ष पुरुष, महिला, युवा, प्रशिक्षक र पिपल्स च्वाइस गरी पाँच विजेताले बजाज पल्सर मोटरसाइकल पाउनेछन् । तीमध्ये दुई एन२५० र तीन एन१६० मोटरसाइकल हुनेछन् । अरू विधाका विजेतालाई जनही ५० हजार रुपैयाँ र गिफ्ट ह्याम्पर प्रदान गरिनेछ ।

स्पोर्ट्स अवार्डको मुख्य प्रायोजकमा हंशराज हुलासचन्द एन्ड कम्पनी तथा सहप्रायोजक र सहयोगीमा ई–सेवा, केल्मी, सूर्य नेपाल प्रालि, होटेल याक एन्ड यती, युनाइटेड अजोड इन्स्योरेन्स, लालपुर्जा नेपाल, सुबिसु, रोयल सिंगी होटेल, प्लाजा ग्रुप अफ होटेल्स, आईएसएस, ई–ड्राइभ नेपाल, राष्ट्रिय खेलकुद परिषद् (राखेप) र नेपाल ओलम्पिक कमिटी छन् ।

तथ्यांकमा वर्ष महिला खेलाडीको उत्कृष्ट आठ मनोनयन

अमिशा कार्की (फुटबल)
– साफ महिला च्याम्पियनसिपमा रजतपदक जित्न सफल
– साफ महिला च्याम्पियनसिपमा दुई गोल गर्न सफल
– साफ यू–२० महिला फुटबलको उपविजेता । चार गोल गर्दै संयुक्त सर्वाधिक गोलकर्ता ट्रफी जित्न सफल 
– नवौँ राष्ट्रिय खेलकुदमा आर्मीबाट कास्य जित्न सफल ।

अनुशा मल्ल (बास्केटबल)
– माल्दिभ्समा भएको साबा वुमेन्स च्याम्पियनसिपमा रजत 
– साबा वुमेन्स च्याम्पियनसिपमा उत्कृष्ट प्रदर्शन गर्न सफल खेलाडी  
– नवौँ राष्ट्रिय खेलकुदमा वाग्मती प्रदेशबाट रजत जित्न सफल ।

डुवाना लामा (पौडी)
– नवौँ राष्ट्रिय खेलकुदमा नौ स्वर्ण र एक रजत जित्न सफल 
– त्रिभुवन आर्मी क्लबबाट खेल्दै सर्ट कोर्समा पाँच राष्ट्रिय कीर्तिमान बनाउन सफल
– २०० मिटर इन्डिभिजुअल मिड्ले, ५० मिटर ब्रेस्टस्ट्रोक, २०० मिटर फ्रिस्टाइल, ४०० मिटर फ्रिस्टाइल रिले, २०० मिटर ब्रेस्टस्ट्रोक, ८०० मिटर फ्रिस्टाइल रिले, ४०० मिटर फ्रिस्टाइल, १०० मिटर ब्रेस्टस्ट्रोक र मिक्स ४०० मिटर रिलेमा स्वर्ण तथा ५० मिटर बटरफ्लाइमा रजत ।

 जयरानी थारु (एथ्लेटिक्स)
– नवौँ राष्ट्रिय खेलकुदमा सर्वाधिक पाँच स्वर्ण, सहभागी सबै विधामा विजेता
– १०० मिटर हर्डल्स, ४०० मिटर हर्डल्स र लङजम्पमा राष्ट्रिय कीर्तिमान
– ४४औँ राष्ट्रिय एथ्लेटिक्समा दुई राष्ट्रिय कीर्तिमानसहित चार स्वर्ण र एक रजत । उत्कृष्ट खेलाडी घोषित ।

पुनम श्रेष्ठ (जुडो)
– बिस्केक एसियाली सिनियर खुला जुडो च्याम्पियनसिपमा कास्य विजेता
– महिला ७० केजीमुनि तौल समूहमा कीर्गिस्तानकी गुल्नुरलाई रिपिचेजमा हराएर कास्य जित्न सफल । 
– नवौँ राष्ट्रिय खेलकुदमा महिला ७० केजी तौल समूहमा स्वर्ण ।

पुष्पा भण्डारी (एथ्लेटिक्स)
– बंगबन्धु शेख मुजिब ढाका म्याराथनमा राष्ट्रिय कीतिमानसहित स्वर्ण   
– १६औँ एसियन क्रसकन्ट्री च्याम्पियनसिप महिला टिममा रजत (राजपुरा पछाई र विन्द्राधन्के श्रेष्ठ) 
– नवौँ राष्ट्रिय खेलकुद महिला १० हजार मिटरमा कास्य 
– सहारा हाफ म्याराथन स्वर्ण
–  कान्तिपुर हाफ म्याराथनमा रजत
– वीर गणेशमान सिंह १० किमि रोड रेसमा रजत
– मदन भण्डारी स्मृति रोड रेस पाँच किमि रोड रेसमा रजत ।

राजपुरा पछाई (एथ्लेटिक्स)
– १६औँ एसियन क्रसकन्ट्री च्याम्पियनसिप १० किमिमा रजत पदक
– १६औँ एसियन क्रसकन्ट्री च्याम्पियनसिप महिला टिममा रजत (पुष्पा भण्डारी र विन्द्राधन्के श्रेष्ठ) 
– नवौँ राष्ट्रिय खेलकुद महिला पाँच हजार मिटरमा रजत 
– वीर गणेशमान सिंह र धरान १० किमि रोड रेसमा स्वर्ण
– कान्तिपुर, पोखरा, लुम्बिनी, इलाम माईपोखरी र प्रधानसेनापति हाफ म्याराथनमा स्वर्ण
– नेपालगन्ज म्याराथनको पाँच किमि दौडमा स्वर्ण
– राष्ट्रिय एथलेटिक्समा तीन हजार मिटर दौडमा रजत ।

श्रेवी महर्जन (ट्रायथलन)
– एसियन कप ट्रायथलन तथा दक्षिण एसियन कप ट्रायथलनमा दक्षिण एसियालीतर्फ रजत   
– नवौँ राष्ट्रिय खेलकुदमा महिला स्प्रिन्टतर्फ रजत ।