काठमाडौं । उज्वेकिस्तानलाई पेनाल्टी सुटआउटमा हराउँदै साविक विजेता कतार एएफसी एसियन कपको सेमिफाइनलमा प्रवेश गरेको छ ।

शनिबार राति कतारको अल बायत रंगशालामा भएको खेलमा घरेलु टिमले उज्वेकिस्तानलाई पेनाल्टी सुटआउटमा ३–२ ले निराश बनाएको हो । 

पेनाल्टीमा कतारका अक्रम अफिफ, सुल्तान अल–ब्राके र पेड्रो मिगुएलले गोल गरे । कतारबाट दोस्रो प्रहाका लागि आएका अल्मोएज अलीको प्रहारलाई उज्वेकिस्तानका गोलकिपरले विफल बनाएका थिए । यस्तै, कतारबाट तेस्रो प्रहारका लागि आएका अल्महदी अली मुख्तरको प्रहार भने आकासिएको थियो ।

उज्वेकिस्तानबाट पहिलो र तेस्रो प्रहारका लागि आएका ओटाबेक शुक्रुरोभ र सोख्बोज उमारोभले गोल गरेका थिए । तर, उज्वेकिस्तानको दोस्रो, चौथो र पाँचौँ प्रहारमा कतारका गोलकिपर बाधक बने ।

त्यसअघि खेलको निर्धारित र अतिरिक्त समय भने १–१ को बराबरीमा समाप्त भएको थियो । खेलको २७औँ मिनेटमा उज्वेकिस्तानका युटकिर युसुपोभबाट आत्मघाति गोल भएपछि कतारले अग्रता बनाएको थियो । तर, ५९औँ मिनेटमा ओडिलजोन हम्रोबेकोभले गोल गर्दै उज्वेकिस्तानलाई खेलमा फर्काएका थिए ।

जितसँगै सेमिफाइनल प्रवेश गरेको कतारले अब फाइनल प्रवेशका लागि इरानसँग खेल्नेछ ।

इरानले शनिबार राति नै भएको क्वार्टरफाइनलमा प्रतियोगिताकै सबैभन्दा सफल टिम जापानलाई २–१ ले हराउँदै अन्तिम–४ को यात्रा तय गरेको हो ।

कतारको इजुकेसन सिटी रंगशालामा भएको खेलमा इरानलाई जित दिलाउन मोहम्मद मोहेबी र अलिरेजा जहनाबक्सले गोल गरे । जापानका हिडेमासा मोरिताले एक गोल फर्काएका थिए ।