काठमाडौं । प्रधानमन्त्री पुष्पकमल दाहाल ‘प्र्रचण्ड’ले नेपाल सरकारले अबदेखि बजेट बनाउने तरिका बदल्ने बताएका छन् । शनिबार उदयपुरको रौतामाई गाउँपालिकाको नवनिर्मित प्रशासकीय भवनको उद्घाटन गर्दै उनले प्रभावकारी कार्यान्वयनका निम्ति अब सरकारले बजेट बनाउने तरिका बदल्ने बताएका हुन् ।
आउँदो जेठमा आउने आर्थिक वर्ष २०८१/०८२ को बजेट वक्तव्यमा तीन करोड रुपैयाँभन्दा कम लागतका योजना संघीय सरकारले कार्यान्वयन नगर्ने निर्णय भइसकेको उनले जानकारी दिए ।
मुलुकको अर्थतन्त्र सही बाटोमा अगाडि बढेको भन्दै उनले पछिल्लो समय अर्थतन्त्रका सबै सूचक सही अवस्थामा फर्किएको स्पष्ट पारे ।
उनले शान्ति प्रक्रियाका केही काम राजनीतिक दलहरुको सहमतिमा टुंग्याइने उनले गरे ।
प्रधानमन्त्री प्रचण्डले सिंहदरबारको अधिकार गाउँगाउँमा पुगेको जनताले अनुभूत हुने गरी सेवा प्रवाह गर्नुपर्नेमा जोड दिए ।
रौतामाई गाउँपालिका–२ स्थित भुट्टारमा करिब १० कट्ठा क्षेत्रफलमा साढे दुईतले प्रशासनिक भवन सात करोड ८७ लाख रुपैयाँ लागतमा निर्माण सम्पन्न भएको रौतामाई गाउँपालिकाले जनाएको छ ।
