काठमाडौं । प्रधानमन्त्री कप पुरुष राष्ट्रिय क्रिकेट प्रतियोगिताबाट शीर्ष चारमा रहँदै नेपाल पुलिस क्लब, त्रिभुवन आर्मी, वाग्मती र मधेस प्रदेश इलाइट कपमा छनोट भएका छन् ।

बुधबार भएको खेलमा कर्णाली र पुलिसले जित निकालेसँगै प्रतियोगिताको शीर्ष चारमा रहने चार टिमको टुंगो लागेको हो ।

कीर्तिपुरस्थित त्रिवि क्रिकेट मैदानमा सम्पन्न खेलमा कर्णाली प्रदेशसँग २१ रनको हार बेहोरेपछि विभागीय टिम सशस्त्र प्रहरी बलको एपीएफ क्लब भने शीर्ष चारमा अटाउन सकेन ।

बुधबारको खेलमा कर्णालीले दिएको २०७ रनको लक्ष्य पछ्याउने क्रममा एपीएफले ४४ ओभरमा सबै विकेट गुमाएर १८५ रनमात्र बनाउन सक्यो ।

एपीएफका ओपनर आसिफ सेखले शतक बनाए पनि टिमलाई जित दिलाउन भने सकेनन् । उनले ११२ बलमा १० चौका र दुई छक्कासहित १०८ रन बनाएका थिए । यसबाहेक, अमरसिंह रौटेलाले २८, कप्तान रोहितकुमार पौडेलले १४ र लोकेश बमले ११ रन बनाए । अन्यले भने दोहोरो अंकमा रन जोड्न सकेनन् ।

कर्णालीका प्रकाश जैसीले चार विकेट लिए । घातक बलिङ गरेको प्रकाशले तीन ओभरमा दुई मेडन फ्याक्दै नौ रनमात्र खर्चिए । दीपेन्द्र रावत र युनिस सिंहले समान दुई विकेट लिए । दीनेश अधिकारी र दीवन पुनले एक–एक विकेट हात पारे ।

त्यसअघि टस हारेर ब्याटिङमा आएको कर्णालीले ४४.१ ओभरमा सबै विकेट गुमाएर २०६ रनको योगफल खडा गरेको थियो ।

यो जितका बावजुद कर्णालीले भने शीर्ष चारमा स्थान बनाउन सकेन । नौ खेलबाट आठ अंक जोडेको कर्णालीले तालिकाको सातौँ स्थानमा रहँदै प्रतियोगिताको अन्त्य गरेको छ । यो हारबाट शीर्ष चारमा पुग्न नसकेको एपीएफ भने नौ खेलबाट १० अंक जोड्दै तालिकाको पाँचौँ स्थानमा छ ।

आजै भएको अर्को खेलमा पुलिसले अपराजित यात्रा कायम राख्ने क्रममा लुम्बिनी प्रदेशविरुद्ध १०३ रनको फराकिलो जित निकाल्यो ।

पुलिसले प्रस्तुत गरेको २४५ रनको लक्ष्य पछ्याउने क्रममा लुम्बिनीले ३६.३ ओभरमा सबै विकेट गुमाएर १४२ रनमात्र बनाउन सक्यो ।

जितसँगै आठ खेलबाट १६ अंक जोडेको पुलिस तालिकाको शीर्ष स्थानमा छ । नौ खेलबाट दुई अंक जोडेको लुम्बिनीले भने तालिकाको नवौँ स्थानमा रहँदै प्रतियोगिताको अन्त्य गरेको छ ।

आजको यी दुई खेलपछि प्रधानमन्त्री कपबाट पुलिसले शीर्ष, आर्मीले दोस्रो, वाग्मतीले तेस्रो र मधेसले चौथो स्थानमा रहँदै इलाइट कपमा स्थान बनाएका हुन् ।

इलाइट कपलाई क्यानले वार्षिक क्यालेन्डरमा समावेश गरे पनि मिति संरचना भने तय भइसकेको छैन । क्यालेन्डर सार्वजनिक कार्यक्रममा क्यानका सचिव पारस खड्काले प्रतियोगिता दुई वा तीन दिने संरचनामा हुने बताएका थिए ।