काठमाडौं । त्रिभुवन विश्वविद्यालयले परीक्षा नियन्त्रक कार्यालयको वेबसाइटमा आएको समस्या समाधानका लागि काम भइरहेको बताएको छ ।

चाँडोभन्दा चाँडो समस्या समाधानका लागि काम भइरहेको परीक्षा नियन्त्रक कार्यालयका सूचना प्रविधि (आईटी) प्रमुखले बताएका छन् ।

आज बुधबार दिनभरी नै वेबसाइटमा आएको समस्याका लागि काम भएको आईटी प्रमुख दीपकबहादुर शाहीले बताए ।

टीयूइक्जामडटईडीयूडटएनपी वेबसाइट रिडाइरेक्ट हुने समस्या मात्रै नभएर भित्र फाइल सिस्टममा पनि समस्या देखिएको उनले बताए ।

बाह्रखरीसँग उनले भने, “सुरुमा हामीलाई रिडाइरेक्ट मात्रै हुने समस्या हो कि भन्ने लागेको थियो । तर, भित्र मोड्युल सिस्टममा र अन्य फाइलहरूमा पनि ‘हिट’ भएको छ ।”

वेबसाइट ह्याक गर्ने काम कसले गर्‍यो र कहाँबाट भयो भन्ने कुरा पत्ता नलागिसकेको उनले बताए । समस्याबारे थाहा भइनसकेको उनको भनाइ छ ।

वेबसाइटको ‘फ्रन्टइन्ड’ र डोमेन रिडाइरेक्ट हुने समस्या आएको तर सम्पूर्ण डाटा अहिलेसम्म सुरक्षित रहेको उनको भनाइ छ ।

“डाटाहरू भने सबै सुरक्षित छ । ठ्याक्कै समय तोकेर भन्न सक्दैनौँ तर चाँडोभन्दा चाँडो समाधानका लागि हामी लागि परेका छौँ,” आईटी प्रमुख शाहीले भने ।

मंगलबार रातिदेखि नै समस्या देखिएको थियो । बुधबार पनि कुनै बेला वेबसाइट खुल्ने र फेरि समस्या देखिने क्रम जारी थियो ।

अहिले वेबसाइट खोल्दा निमार्णको क्रममा रहेको सन्देश होमपेजमा देखिन्छ । यो समाचार तयार पार्दा ‘वेबसाइट निमार्णको क्रममा छ’ भन्ने सन्देश वेबसाइटको होमपेजमा राखिएको छ । त्यसअघि उक्त वेबसाइटको यूआरएल खोल्दा एउटा फेसबुक अकाउन्टमा रिडाइरेक्ट भइरहेको थियो ।

वेबसाइट बनाउने कम्पनी ‘वान अप कम्युनिकेसन’ले भने समस्या समाधानका लागि प्रयास गरिरहेको जानकारी दिएको छ ।बाह्रखरीले गरेको सम्पर्कमा कम्पनीले काम भइरहेको र भोलिसम्म वेबसाइटमा देखिएको समस्या समाधान हुने बताएको छ ।तर, कम्पनीले समस्या के हो र कसरी देखियो भन्नेबारे थप विवरण दिएको छैन ।