काठमाडौं । त्रिभुवन विश्वविद्यालय परीक्षा नियन्त्रण कार्यालयको ह्याक भएको वेबसाइट अझै बन्न सकेको छैन ।
मंगलबार रातिदेखि नै कार्यालयको वेबसाइट टीयूइक्जामडटईडीयूडटएनपी मा समस्या देखिएको थियो । बुधबार पनि कुनै बेला वेबसाइट खुल्ने र फेरि समस्या देखिने क्रम जारी छ ।
अहिले वेबसाइट खोल्दा निमार्णको क्रममा रहेको सन्देश होमपेजमा देखिन्छ । त्यसअघि उक्त वेबसाइटको यूआरएल खोल्दा एउटा फेसबुक अकाउन्टमा रिडाइरेक्ट भइरहेकाे थियाे ।
यस विषयमा त्रिभुवन विश्वविद्यालयका सूचना अधिकारी योगेन्द्रप्रसाद दाहालले आफूलाई जानकारी नै नभएको बताए ।
उक्त वेबसाइट बनाउने कम्पनी 'वान अप कम्युनिकेसन'ले भने समस्या समाधानका लागि प्रयास गरिरहेको जानकारी दिएको छ ।
बाह्रखरीले गरेको सम्पर्कमा कम्पनीले आज साँझ वा भोलिसम्म वेबसाइटमा देखिएको समस्या समाधान हुने बताएको छ । तर, कम्पनीले समस्या के हो र कसरी देखियो भन्नेबारे थप विवरण दिन चाहेन ।
